Shymkent pen Nur-Sultandaǵy sý únemdeý tásilin basqa óńirlerge taratý kerek – Asqar Mamın
«Bizdiń aldymyzda 2025 jyldyń sońyna deıin halyqty taza aýyz sýmen 100% qamtamasyz etý mindeti tur. Ony sheshý joldary Nur Otan partııasynyń baǵdarlamasy men óńirlerdi damytý jónindegi ulttyq joba aıasynda kózdelgen. Osy jyldyń qorytyndysy boıynsha aýyz sýmen qamtamasyz etý aýyldarda – 91,8%, qalalarda – 98% bolady. Qalǵan aýyldyq eldi mekenderdi sapaly aýyz sýmen qamtamasyz etý jumystary jalǵasady», - dedi Asqar Mamın Úkimettiń búgingi otyrysynda.
Úkimet basshysy aýyz sýmen qamtamasyz etý kórsetkishteri tómen óńirler jumysty jandandyryp, kelesi jyly ortasha respýblıkalyq deńgeıge qol jetkizýi keregin aıtty. Ásirese Qostanaı, Shyǵys Qazaqstan, Soltústik Qazaqstan jáne Jambyl oblystary ataldy.
«Bul rette eldi mekender ishinde sýmen jabdyqtaý jobalary toptyq sý qubyrlarynyń ınfraqurylymyn salý josparlarymen bir ýaqytta júrgizilýi tıis. Ákimdikter aýyldardy sýmen jabdyqtaý boıynsha jobalaý-smetalyq qujattamany ýaqtyly ázirleý jumystaryn jandandyrsyn.
Salany avtomattandyrý jáne ınnovatsııalyq tehnologııalardy engizý qarqynyn arttyrý qajet. Shymkent pen Nur-Sultan qalalarynda óndiristik protsesterdi avtomattandyrý jáne esepteý aspaptaryn ornatý esebinen turǵyndardyń eleýli qarajaty únemdelip, sý shyǵyny men qyzmet kórsetý shyǵyndary azaıdy. Osyndaı tásilderdi eldiń basqa óńirlerinde de qoldaný qajet», - dedi Premer-mınıstr.