Shymkent óz múmkindigimen ary qaraı damýǵa qaýqarly - Azat Perýashev

ASTANA. QazAqparat - Jańa oblys ortalyǵynyń qurylýy ońtústik óńirdiń damýyna erekshe áser etedi. Bul týraly Májilistiń jalpy otyrysynan keıin tilshilerge depýtat Azat Perýashev, dep habarlaıdy QazAqparat.

«Keshegi tarıhı sheshimmen barsha Qazaqstan halqyn quttyqtaımyn! Bul óz kezeginde elimiz úshin úlken qýanysh. Rasynda da, bul baǵyttaǵy qadamdar ońtústik óńirimizdiń damýyna erekshe áser etedi dep senimdimin. Eger de Shymkent qalasyna toqtalatyn bolsaq, turǵyndar sany mıllıonǵa jetken megapolıster óz múmkindikterine súıenip, ary qaraı damýǵa qaýqarly bolady. Oǵan eshqandaı kúmán joq. Mundaı shaharlar ákimshilik ári saıası qoldaýsyz da ózin-ózi qamtamasyz ete alady», - dep toqtaldy Azat Perýashev.

Osy oraıda depýtat  Elbasynyń 19 maýsymda qol qoıǵan Jarlyǵy óte júıeli ári qajetti sheshim ekenin atap ótti.

«Túrkistan bizdiń rýhanı ortalyǵymyz dep aıtýǵa bolady. Bul qalaǵa saıası maǵyna berip, ony jańa dárejege kóterý arqyly osy óńirdiń turǵyndaryna úlken tabys bolady dep bilemiz. Munymen qosa, Túrkistan oblysynyń paıda bolýy dúnıejúzindegi túrki halyqtary arasynda Qazaqstannyń rólin, ornyn jańa beleske shyǵarady dep senemin»,- dep túıdi A. Perýashev.

Budan buryn habarlanǵandaı, Elbasy Nursultan Nazarbaev Túrkistan oblysynyń paıda bolýyna baılanysty pikir bildirdi.

Sonymen qatar, Prezıdent jańa oblys ortalyǵynyń qurylýyna baılanysty birqatar tapsyrmalar júktedi.