Shymkent munaı óńdeý zaýytynda jóndeý jumysy merziminen buryn aıaqtaldy

ShYMKENT. QazAqparat - 7 sáýirde Shymkent munı óńdeý zaýyty josparly aldyn ala jóndeý jumystaryn aıaqtady. Kestege sáıkes kásiporyndaǵy jóndeý jumysy osy jyldyń 15 naýryzynan 8 sáýirine deıin júrýge tıis edi. Jumys merziminen buryn aıaqtalyp, zaýyt ishki naryq úshin ónim shyǵara bastady, dep habarlaıdy QazAqparat QazMunaıGaz baspasóz qyzmetine silteme jasap.

Josparǵa saı sáýirde zaýyt 366 myń tonna munaı óńdeýi qajet.

Benzın óndirisi 110,1 myń tonna, dızel otyny – 114,8 myń tonna, suıytylǵan munaı gazy – 15,1 myń tonna, áýe otyny – 19,3 myń tonna, mazýt – 77,6 myń tonna kóleminde josparlanyp otyr.

Barlyq jóndeý jumystary ýaqtyly, al keıbiri ýaqytynan buryn oryndalǵanyn atap ótken jón.

Aıtalyq, munaıdy bastapqy aıdaý qondyrǵysy jumys rejımine josparly merziminen bir táýlik buryn, katalıtıkalyq krekıng qondyrǵysy 5 táýlik buryn shyǵaryldy.

Munaıdy bastapqy aıdaý, katalıtıkalyq rıformıng, dızel otynyn gıdrotazartý, kerosındi gıdrotazartý, katalıtıkalyq krekıng qondyrǵylarynyń jekelegen bólshekterin aýystyrý, qalpyna keltirý jáne jabdyqtaryn baptaý sııaqty is-sharalar atqaryldy.

Jóndeýge 22 merdiger uıym men 1305 maman tartylyp, jumysqa jumyldyryldy.

Maqsaty – zaýyt jabdyqtarynyń kepildi jumysyn qamtamasyz etý.

«Azamattyq qorǵaý týraly» zańynyń talaptaryna saı jabdyqtar men tehnıkalyq qubyrlarǵa tehnıkalyq kýálandyrý men ónerkásiptegi qaýipsizdigine saraptama júrgizildi.

2022 jyldyń qorytyndysy boıynsha «PQOP» JShS rekordtyq kólemde 6,2 mln tonna munaı óńdegenin eske sala keteıik.

Budan buryn Memleket basshysy zaýyttyń óndiristik qýatyn arttyrý jáne munaı óńdeý kólemin jylyna 12 mln tonnaǵa deıin ulǵaıtý mindetin qoıdy.