Shymkent munaı óńdeý zaýytynda 15 naýryzda jóndeý jumysy bastalady

ASTANA. QazAqparat – Shymkent munaı óńdeý zaýyty bir aıǵa jýyq josparly jóndeýden ótedi, dep habarlaıdy QazAqparat tilshisi Energetıka mınıstrliginiń baspasóz qyzmetine silteme jasap.

Mınıstrliktiń aqparaty boıynsha, Qazaqstan Respýblıkasynyń «Azamattyq qorǵaý týraly» Zańyna sáıkes ónerkásiptik qaýipsizdikti qamtamasyz etý jáne tehnologııalyq jabdyqtar men qubyrlardy, energetıkalyq jabdyqtardy, tehnologııalyq protsesterdi basqarýdyń avtomattandyrylǵan júıesin jáne baqylaý-ólsheý quraldaryn kýálandyrý úshin munaı óńdeý zaýyttaryna josparly túrde aldyn ala jóndeý júrgizý talap etiledi.

«2022 jylǵy jeltoqsanda bekitilgen kestege sáıkes, Shymkent munaı óńdeý zaýytyna bıyl 15 naýryz ben 9 sáýir aralyǵynda jóndeý júrgiziledi. Jóndeý jumystary jabdyqtyń jumys qabilettiligi men onyń jekelegen bólikterin aýystyrýdy, qalpyna keltirý jáne olardy retteı otyryp, qamtamasyz etýdi kózdeıdi», - dep málim etti mınıstrliktiń baspasóz qyzmetinen.