Shymkent gúl dúkenindegi oqıǵa: Buzaqynyń qasynda kirister departamentiniń qyzmetkeri bolǵan

ASTANA. QazAqparat – Shymkentte gúl satýshyny urǵan buzaqynyń qasyndaǵy ekinshi adam Eńbekshi aýdany boıynsha memlekettik kirister basqarmasy basshysynyń orynbasary bolyp shyqty, dep habarlaıdy QazAqparat tilshisi Shymkent qalalyq memlekettik kirister departamentine silteme jasap.

«10.08.2023 jyly Shymkent qalasyndaǵy gúl dúkenindegi oqıǵaǵa qatysty áleýmettik jelilerde taraǵan beınejazbada quqyq buzýshynyń qasynda bolǵan ekinshi tulǵa – Eńbekshi aýdany boıynsha memlekettik kirister basqarmasy basshysynyń orynbasary D.Elqondy. Osyǵan baılanysty Shymkent qalasy boıynsha Memlekettik kirister departamenti tarapynan mán-jaıdy anyqtaý maqsatynda 10 tamyzda qyzmettik tergeý taǵaıyndaldy», - delingen resmı habarlamada.

Aqparatta aıtylǵandaı, D.Elqondynyń jaýapkershilik máselesi tártiptik komıssııa otyrysynda qaralady.

Sondaı-aq Shymkent qalalyq kirister komıtetinen, qabyldanǵan sharalar týraly qosymsha habarlanatyny aıtyldy.

Eske sala keteıik, gúl dúkenindegi vıdeoǵa qatysty Shymkent prokýratýrasy túsinik bergen edi.

Keıin Іshki ister mınıstrligi Shymkenttegi gúl dúkeninde eki bólek oqıǵa bolǵanyn habarlap, ár jaıt boıynsha resmı aqparattandyrdy.