Shymkent barshaǵa úlgi bolýy tıis - Erlan Aıtahanov

ShYMKENT. QazAqparat – Búgin Shymkent qalasynyń ákimi Erlan Aıtahanovtyń tóraǵalyǵymen «Shymkent - dostastyqtyń 2020 jylǵy mádenı astanasy» jobasy aıasynda jyl boıyna ótkiziletin is-sharalar barysy pysyqtaldy. TMD elderimen mádenı baılanysty nyǵaıtýǵa baǵyttalǵan atalmysh sharany joǵary deńgeıde ótkizý jaıy talqylandy, dep habarlaıdy QazAqparat tilshisi.

Aýqymdy sharany uıymdastyrý tek mádenıet basqarmasynyń mindeti emes ekenin aıtqan qala basshysy barlyq sala jetekshilerin tıisti jumystarǵa jumyla kirisýge naqty tapsyrma berdi. Qazaqtyń ulttyq qundylyqtary men rýhanı baılyqtaryn álemge pash etý múmkindigi týyp otyrǵanyn naqtylap aıtty.

«Qolǵa alynyp jatqan jobalardyń basty maqsaty – respýblıkalyq mańyzy zor úshinshi megapolıs – Shymkentti, onyń tarıhı mańyzy men mádenı muralaryn álemge tanytý jáne qalanyń jan-jaqty kórkeıip, kóriktenýine, ósip-órkendeýi jolyndaǵy tyń tynysyn ashýǵa yqpal etý. 2020 jyly osy is-sharalar arqyly qazaqtyń ulttyq qundylyqtary men rýhanı baılyqtaryn álemge pash etýimiz kerek. Sondyqtan keler jyly aýqymy keń is-sharalardyń tıisti deńgeıde ótkizý úshin biz jumyla eńbek etýimiz qajet. Al osynaý ıgi jumystardy atqarýda eń birinshi bizge «qaıyrymdy qala» ataýyna laıyq bolýymyz shart. Sebebi, qaıyrymdy bolmaı qaıyrly isterdi júzege asyrý múmkin emes. Shymkent barshaǵa úlgi bolýy tıis», - dedi Erlan Aıtahanov.

Aıta keteıik, 2020 jyldyń sáýir aıynda shaharda «Shymkent - TMD elderiniń mádenı astanasy» jylynyń saltanatty ashylý rásimi ótedi. Atalǵan shara aıasynda TMD elderi óner sheberleriniń merekelik kontserti men «Jibek joly» ulttyq salt-dástúr men zamanaýı qolóner kórmesi uıymdastyrylmad. Sondaı-aq, «Shymkent - qyzǵaldaqtar qalasy» TMD jáne basqa elderiniń sýretshiler jáne fotosýretshiler baıqaýy, drama teatrlary, anımatsııalyq fılmder, opera juldyzdarynyń festıvali, Halyqaralyq aqyndar aıtysy jáne alǵash ret «Dýsha Evrazıı» I halyqaralyq estrada ánderin oryndaýshylardyń festıvali, aqyn-jazýshylar kezdesýleri jáne basqa da 40-tan astam is-shara ótkizý josparlanyp otyr.

Sonymen qatar, qarasha aıynda halyqaralyq «Sodrýjestvo debıýtov» júldesin tapsyrý jáne «Shymkent - dostastyqtyń mádenı astanasy» jylynyń saltanatty jabylý rásimi ótedi dep kútilýde.