Shymkent áýejaıynyń jańa termınaly qashan salynady

ASTANA. QazAqparat – Shymkent áýejaıynyń jańa termınaly qurylysyn bıyl aıaqtaý úshin qajetti is-sharalar qabyldaý qajet. Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Aerodrom jabyndarynyń durys emes jaǵdaıy ushý qaýipsizdigine tikeleı áser etetin jáne damýdy tejeıtin faktor sanalady. Astana qalasynyń áýejaıyndaǵy qoldanystaǵy ushý-qoný jolaǵy 20 jyl buryn paıdalanýǵa berilgen. Osy ýaqytqa deıin tek aerodrom jabyndaryna aǵymdaǵy jóndeý júrgizildi. Búgingi tańda olardyń jaǵdaıy óte qıyn. Óıtkeni 2 jóndeý merzimi keshiktirildi. Osyǵan baılanysty, «Astana qalasy áýejaıynyń ınfraqurylymyn kúrdeli jóndeý jáne jańǵyrtý» jobasy boıynsha jobalaý-smetalyq qujattamasy ázirlenip, memlekettik saraptamanyń oń qorytyndysy alyndy. Bıýdjettik ótinimdi qalyptastyrý úshin qujattamalar daıyndalýda», - dedi mınıstr.

Onyń aıtýynsha, bul jumysty jedeldetý úshin Indýstrııa mınıstrligi Qarjy mınıstrligimen qujattardy pysyqtap jatyr.

«Taǵy bir másele, Shymkent áýejaıynyń jańa termınalynyń qurylysy sozylyp ketti. Paıdalanýǵa berý merzimi 2020 jyldyń birinshi jartyjyldyǵyna belgilengen edi. Alaıda, sot isine jáne jer ýchaskesin ýaqtyly bólmeýge baılanysty birqatar sebeptermen qurylys protsesi 4 jyldan astam ýaqyt boıy júrgizilip keledi. Shymkent qalasynyń ákimdigi bıyl jobany aıaqtaý boıynsha barlyq qajetti is-sharany qabyldaýy qajet. Atap aıtqanda, baǵalaý saraptamasyn júrgizip, jer ýchaskesin berý rásimderin jedeldetýi tıis», - dedi Marat Qarabaev.