Shymkent «ashyq ákimdik» formatynda jumys isteı bastady

ShYMKENT. QazAqparat - Shymkent qalasynyń ákimdigi halyqqa qolaıly memlekettik qyzmet túrlerin usyný maqsatynda «ashyq ákimdik» formatynda jumys isteýdi qolǵa aldy. Bul joba - Memleket basshysy Qasym-Jomart Toqaevtyń jergilikti atqarýshy organdardyń halyqpen tyǵyz baılanys ornatýdyń jańa formatyna kóshý týraly tapsyrmasy aıasynda qala ákimi Ǵ.Ábdirahymovtyń bastamasymen júzege asyp otyr, dep habarlaıdy QazAqparat tilshisi.

Ákimdik ǵımaratynyń birinshi qabatynan ashylǵan «Halyqpen qyzmet» ortalyǵynda turǵyndar úshin arnaıy elektrondy kezek zaly qyzmet ete bastady. Onda mamandar kelýshilerge jer, turǵyn úı, áleýmettik salalar men qurylys, jol syndy máseleleri boıynsha keńes berip, qyzmet kórsetedi. Kelýshiler úshin kútý zaly, tegin wi-fi men bankomattar jáne tólem termınaldary, arnaıy e-gov portalyna qosylǵan termınaldar ornatylǵan.

Sonymen qatar, munda qala ákimi men orynbasarlary turǵyndarmen «Ashyq dıalog» formatynda jumys jasaý úshin open space zaldary quryldy. Onda qala ákiminen bólek, onyń árbir orynbasarlary óz salalary boıynsha apta saıyn azamattardy jeke máseleleri boıynsha qabyldaıtyn bolady.

Aıta keteıik, N.Nazarbaev dańǵyly, 10 mekenjaıynda ornalasqan atalǵan ortalyq arqyly memlekettik qyzmet salasyn ýaqyt talabyna saı jetildirip, basqarý júıesiniń tıimdiligin arttyrý kózdelgen.