Shymkent ákimi Qytaıdyń Qazaqstandaǵy elshisimen kezdesti

ShYMKENT. QazAqparat – Shymkent qalasynyń ákimi Erlan Aıtahanov Qytaı Halyq Respýblıkasynyń Qazaqstan Respýblıkasyndaǵy elshisi Chjan Sıaomen kezdesti, dep habarlaıdy QazAqparat tilshisi.

Kezdesýde taraptar Qazaqstan men Qytaı Halyq Respýblıkasy arasyndaǵy tatý kórshilik qarym-qatynastardy odan ári nyǵaıtýdyń jáne ózara tıimdi yntymaqtastyqty damytýdyń mańyzdylyǵyn atap ótti.

Júzdesý barysynda Erlan Aıtahanov qalanyń ekonomıkalyq damýy men ınvestıtsııalyq áleýeti týraly habardar etti. «Ózińizge málim, Memleket basshysy Qasym-Jomart Toqaev Beıjińde ótken Qazaqstan-Qytaı Іskerlik keńesiniń altynshy otyrysynyń ashylýynda Qytaı Qazaqstannyń eń iri syrtqy saýda jáne ekonomıkalyq áriptesteriniń biri ekendigin aıtqan bolatyn. Osy baǵyttaǵy jumystardy jandandyrý úshin óndirisi men ınfraqurylymy damyp kele jatqan megapolıske ınvestorlardy shaqyramyz. Sebebi, Uly Jibek jolynyń boıynda ornalasqan iri tranzıttik dálizderi bar Shymkentte ınvestorlar úshin qolaıly jaǵdaı jasalǵan. Sondyqtan biz túrli baǵytta áriptestik ornatýǵa nıettimiz»,- dedi qala ákimi. Óz kezeginde elshi Chjan Sıao Elbasy Nursultan Nazarbaevtyń eki memlekettiń dostyq qarym-qatynasyn nyǵaıtýǵa qosqan zor úlesi men úlgili sara jolyn ári qaraı jalǵastyrý qajet ekenin jetkizdi. Sondaı-aq, ınvestorlarǵa qatysty aıtylǵan pikirmen kelisetindigin jáne osy baǵytta jumystar atqarylatyndyǵyn aıtty. Basqosý sońynda qala basshysy bul kezdesý ekijaqty mádenı, bilim, áleýmettik ekonomıkalyq salanyń damýyna septigin tıgizerine senim bildirdi.