Shymbulaqqa tek qana elektr qýatymen júretin kólikter kóterile alady - ákimdik

ALMATY. QazAqparat – Shymbulaq aýmaǵyna benzın, dızel jáne gazben júretin kólikterdiń kirýine tyıym salynady. Bul týraly Almaty qalasy ákiminiń orynbasary Álisher Ábdiqadyrov málim etti. QazAqparat tilshisi habarlaıdy.

Medeýge beket qoıyldy. Bıyl kamera ornattyq. Beınebaqylaý kamerasy polıtsııa departamentiniń jedel basqarý ortalyǵymen biriktirilgen. Ákimdik arnaıy jobasyn ázirledi, ol qabyldanǵannan keıin Shymbulaqqa ishten janatyn qozǵaltqyshy bar avtokólikterdiń kirýine tyıym salynady, ıaǵnı benzın, dızel jáne taǵy basqasy. Bul sol jerde turatyn adamdarǵa da qatysty. Biz olarǵa osyndaı jumystardyń júrgizilip jatqanyn habarladyq. Turǵyndar eshqandaı qarsylyq bildirgen joq. Meniń bilýimshe, qazir olar elektrli kólikterdi belsendi túrde satyp ala bastady. Ákimdiktiń qaýlysy kúshine engennen keıin Shymbulaqta jyljymaıtyn múlki barlar ol jaqqa tek elektr kóligimen ǵana kire alady, -

dedi Álisher Ábdiqadyrov óńirlik kommýnıkatsııalar qyzmetinde ótken brıfıngide.

Onyń aıtýynsha, Shymbulaqta qazir 54 turǵyn úı bar. Al, shaǵyn jáne orta bıznes úshin ýaqyt berilmek.

«Ózderińiz biletindeı, elektrli júk kólikteri jeńil avtokólikterge qaraǵanda kesh damydy. Búginde júk kólikteri naryǵynda usynystar shekteýli», - dedi spıker.

Qazir Shymbulaqqa tek elektromobıldermen ǵana emes, ishten janatyn qozǵaltqyshy bar kóliktermen de shyǵýǵa bolady. Bul kommýnaldyq qyzmetter, qutqarýshylar, polıtsııa qyzmetkerleri, sondaı-aq taý shańǵysy kýrortynda turatyn nemese jumys isteıtin adamdarǵa qatysty.

Eske salaıyq, byltyrdan beri Medeý men Shymbulaqqa elektrli avtobýstar qatynaıdy.