«Shymbulaq, Kóktóbe, Medeý»: Almatyda qaı jerde demalýǵa bolady
Almaty qalalyq ákimdiginiń málimetinshe, jyl basynan beri megapolıske 197 myńnan astam sheteldik týrıst kelgen. Bul ótken jyldyń sáıkes kezeńimen salystyrǵanda 49,3 paıyzǵa artyq.
Almatynyń kórikti jerleri:
Kóktóbe– Іle Alataýynyń bókterinde ornalasqan kórikti jerlerdiń biri. Teńiz deńgeıinen 1100 m joǵary. Kóktóbeden qalanyń keremet kórinisin tamashalaýǵa bolady. Munda kelgen demalýshylar úshin arnaıy dámhanalar, túrli oıyn-saýyq kesheni, kontsert zaly, átkenshek, kishigirim zoobaq bar. Taýdyń taza aýasy adamǵa erekshe áser syılaıdy. Kóktóbede bıiktigi 372 m televızııalyq munara ornalasqan. Qala ortalyǵynan Kóktóbege aspaly jol arqyly barýǵa bolady. Aspaly joldyń uzyndyǵy – 1620 m.
Aspaly jolmen júrý quny (eki baǵytqa) – 5 000 teńge. 12 jasqa deıingi balalar úshin – 2 500 teńge.
Arnaıy shaǵyn avtobýsta jol júrý aqysy – 1 500 teńge. 12 jasqa deıingi balalarǵa – 700 teńge.
Medeý – jasandy muz aıdyny bar dúnıejúzindegi eń iri sport kesheni. Almaty qalasynan 18 shaqyrym jerde, Kishi Almaty shatqalynda, teńiz deńgeıinen 1691,2 m bıiktikte ornalasqan. Bul jer búginde demalýshylar úshin jyldyń tórt mezgilinde de taptyrmas ǵajaıyp oryn. Aýmaǵy 10,5 myń km muzdatylǵan alań qala qonaqtary men turǵyndarynyń syrǵanaýyna arnalǵan. Bir mezette 2-3 myń adamdy qabyldaıdy. Munda konkı, mánerlep syrǵanaý, hokkeıden jarystar ótip turady. Sondaı-aq 842 satysy bar baspaldaqpen joǵaryǵa minip-túsýdiń ózi keremet sezim syılaıdy.
Munda qaladan №12 avtobýspen nemese taksımen jetýge bolady.
Shymbulaq taý-shańǵy kýrorty – Almaty qalasynyń ortalyǵynan 25 shaqyrym jerde, Іle Alataýy shatqalynda 2260 metr bıiktikte ornalasqan. Demalys orny qysy-jazy jumys isteıdi. Tek jolǵa shyqpastan buryn, mundaǵy aýa temperatýrasy qaladan 10 gradýsqa tómen bolatynyn eskergen abzal. Shymbulaqqa jaıaý, aspaly jolmen nemese arnaıy taksımen jetýge bolady.
Shymbulaqqa kóterilip-túsý quny eresekter úshin – 5 000 teńge, balalarǵa 1 000-1 500 teńge.
Ortalyq demalys saıabaǵy – taza aýada tynyǵyp, jaqyndaryńmen demalyp, kóńil kóterýge arnalǵan oryn. Munda túrli attraktsıon, sport jáne balalar alańdary jumys istep tur. Sýǵa túsýge arnalǵan akvapark te jaz aılarynda demalýshylardy kútedi. Munda qaıyqpen, katamaranmen serýendep, jaǵalaýda tamaqtanýǵa bolady.
Gorkıı saıabaǵynan shyqpaı-aq, ártúrli janýarlardy kórip shyǵýǵa bolady. Almaty zoobaǵy 1937 jyly qurylǵan. Aýmaǵy – 22 gektar. Baqtaǵy janýarlar 6 sektsııaǵa ornalastyrylǵan: jyrtqysh sútqorektiler, tuıaqtylar, prımattar, qustar, ekzotarıým men akvarıým.
Haıýanattar baǵy saǵat 10:00-den 19:00-ge deıin jumys isteıdi. Kassa 18:00-ge deıin ashyq bolady. Balalar bıleti 300, eresekter úshin 800 teńge turady. Mekenjaıy: Ormanova kóshesi 66.
Saıabaqqa jetý ońaı. Oǵan birqatar qoǵamdyq kólik barady.
28 gvardııalyq-panfılovshylar atyndaǵy saıabaq qalanyń qaq ortasynda ornalasqan. Saıabaq dańq memorıaly jáne máńgi alaýymen tanymal. Qala turǵyndary men qonaqtary ataqty 316-shy atqyshtar dıvızııasynyń komandıri Ivan Panfılovtyń eskertkishin, Aýǵan soǵysynda qaıtys bolǵan jaýyngerlerge arnalǵan jáne ózge de monýmentterdi kóre alady. Biraq park tek soǵys batyrlarynyń eskertkishterimen ǵana tanymal emes. 28 panfılovshylar parkiniń aýmaǵynda XX ǵasyrǵa tıesili Voznesenskıı kafedralyq shirkeýi, Halyqtyq mýzykalyq aspaptar mýzeıi jáne Ofıtserler úıi tárizdi birneshe tarıhı ǵımarat ornalasqan. Saıabaqta fotoǵa túsýge, kepterlerdi qorektendirýge bolady.
Arbat – basty jaıaý kóshe. Ol erekshe mádenıetimen, sýretshilerimen jáne kóshe boıyndaǵy sýretterimen tanymal. Jastardyń eń kóp jınalatyn jeri de osy. Arbat — estetıkalyq tárbıe alyp, shýly qalanyń ortasynda erkin demalyp qaıtýǵa bolatyn oryn. Mekenjaıy: Abylaı han dańǵyly men Qonaev kósheleriniń aralyǵy, Jibek joly dańǵyly.
Úlken Almaty kóli – Almaty qalasynan ońtústikke qaraı 15 shaqyrym qashyqtyqta ornalasqan Іle Alataýynyń jotasyndaǵy kól. Teńiz deńgeıinen 2510 metr bıiktikte ornalasqan kóldiń sulýlyǵynda sóz joq. Kóldiń jaz mezgilindegi kórinisi óte keremet. Ásirese, tań sáride sý betine aspan men ony qorshaǵan orta beınesi shaǵylysqan kezde ádemi. Adamnyń kóńiline erekshe áser beredi.
Qazir ol jaqqa aparatyn jol jóndeýge jabylǵan. Sondyqtan jaıaý barýǵa týra keledi.
Qazaqstan Respýblıkasy Tuńǵysh Prezıdentiniń saıabaǵy ál-Farabı-Naýaı-Saın-Dýlatı kósheleriniń aınalmaly qıylysynda ornalasqan. Almatydaǵy eń úlken sýburqaq osy saıabaqta. Jamylǵy alyp, kitap oqyp, badmınton men frısbı oınap, jaı ǵana sergip qaıtatyn súıikti jerlerdiń biri. Tamasha tabıǵat romantıkalyq fotosessııa úshin de taptyrmas oryn.
Baým toǵaıy – memlekettik tabıǵat eskertkishteriniń biri. Toǵaı Almatydaǵy Túrksib aýdanynyń Seıfýllın jáne Súıinbaı dańǵylynyń qıylysynda teńiz deńgeıinen 750 metr bıiktikte ornalasqan. Aýmaǵy – 139, 5086 ga.
Baým toǵaıy – Almatynyń kóne aımaǵy. Qala úshin onyń mańyzy úlken. Mundaǵy qoldan jasalǵan orman ekologııalyq, mádenı jáne estetıkalyq jaǵynan da qundy.
Botanıkalyq baq. Bul – almatylyqtar erekshe qurmetpen qaraıtyn oryn. Baqtyń jalpy aýmaǵy – 104 gektar. Bul jerden Reseı, Kavkaz, Shyǵys Azııa men Soltústik Amerıka jerlerinde ósetin ósimdikter, aǵashtar men butalardy kezdestirýge bolady. Baqqa kelýshilerge barlyq jaǵdaı jasalǵan. Munda pıknık jasaýǵa bolmaıdy, ol úshin arnaıy oryndyqtar qoıylǵan.
Baqtyń úsh kireberisi bar. Soltústik kireberis – Tımırıazev kóshesi, 36, Batys kireberis – Tımırıazev, 42 jáne úshinshi esik – ońtústik kireberis. Oǵan ál-Farabı dańǵyly jaǵynan kirýge bolady.
Kirý aqysy: eresekterge – 850 teńge, stýdentterge – 685 teńge, mektep oqýshylary, zeınetkerler men AÁK alýshylar 503 teńge tóleıdi. Kishkentaı balalarǵa, múgedekter men ardagerlerge – tegin.
Almatyda jasqa da, kárige de barlyq jaǵdaı jasalǵan.
Qalada mýzeıler, kınoteatrlar jáne saýda ortalyqtary óte kóp. Alýan túrli dámhana, meıramhana, klýb, bılıard oınaıtyn oryndar jaqsy demalys syılaıdy.
Qalada keshke jáne túnde túrli tústi jarq-jurq etken shamdar janyp, tańǵalarlyq sulý keıipke enedi.
Almaty ákimdigi bergen aqparat boıynsha, sheteldik týrıster megapolıste tórt kúnnen artyq aıaldamaıdy. Bir sheteldik qonaqtyń ortasha shyǵyny – 2 200 dollar. Al otandyq týrıst úshin ortasha chek – 500 dollar (bes kún).
«Bul ekonomıkalyq ósimdi kórsetedi. Týrıster jumsaǵan qarajat qala ekonomıkasyna, salyq, túrli tólemder men jalaqy arqyly kórinedi», – dedi ákimdikten.
Ákimdiktiń málimetinshe, qalada týrıstik marshrýttarǵa qatysty 10 arnaıy aqparattyq pýnkt bar. Munda keńesshiler jumys isteıdi. Týrısterge aqysyz negizde týrıstik kartalar, taý marshrýttarynyń atlastary, týroperatorlardyń broshıýralary, mádenı is-sharalar týraly habarlandyrýlar jáne aqparattyq sıpattaǵy basqa da materıaldar usynylady.
«Qazir týrısterge «Shymbulaq» taý kýrorty, «Medeý» sport kesheni, Fýrmanov shyńy men Kókjaılaý shatqaly sııaqty taýly aımaqtarǵa barý usynylady», – dep atap ótti vedomstvodan.