Shyǵystan shyqqan qalamgerler kúlli dúnıeni moıyndatyp otyr – QR Prezıdenti

NUR-SULTAN. QazAqparat – Shyǵystan shyqqan qalamgerler kúlli dúnıeni moıyndatyp otyr. Bul týraly búgin elordada ótip jatqan Azııa elderi qalamgerleriniń tuńǵysh forýmynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Azııa ádebıetiniń órisi aıtarlyqtaı keńeıip keledi. Shyǵystan shyqqan qalamgerler kúlli dúnıeni moıyndatyp otyr. Bul rette Azııa ádebıetin álemge áıgilep, dáripteı túsý - forýmnyń taǵy da bir mańyzdy mindeti dep sanaımyn. Shyǵys danalarynyń dástúr sabaqtastyǵy sizderdiń týyndylaryńyz arqyly jalǵasyn tabady dep oılaımyn», - dedi Memleket basshysy.

Qazaqstan Prezıdenti jahandaný dáýirinde Azııa syn-qaterlerge laıyqty tótep bere otyryp, ózine tán biregeı erekshelikterin saqtap kele jatqanyn aıtty.

«Batys tehnologııasy Azııa rýhanııatymen úndesip, shyǵystyq jańǵyrý úrdisin dúnıege ákeldi. Qalalarda shyǵys áleminiń bolmys-bitimin nasıhattaıtyn kreatıvtik klass paıda boldy. Rýhanı baılanystardy keńeıtý jańa zamandaǵy Azııa halyqtarynyń birtutastyǵynyń kepili. Biz bul úrdisti qoldap, álem halyqtarynyń yntymaq-birligin nyǵaıtýǵa úles qosýǵa tıispiz», - dedi Q.Toqaev.