«Shyǵysqazaqstandyq kenshiler álemdegi eń úlken «BelAZ» mashınasyn qoldan qurastyrdy» - baspasózge sholý
***
«Egemen Qazaqstan» gazetiniń jazýynsha, Content Review saraptama agenttiginiń anyqtaýy boıynsha Qazaqstan mobıldi ınterneti arzan elderdiń reıtınginde 9-orynǵa kóterildi. Mamandar mundaı nátıjege 2014 jylǵy ishki jalpy ónim kólemi boıynsha úzdik 50 eldegi jaǵdaıdy saraptaý arqyly qol jetkizgen.
Atalǵan agenttik mobıldi ınternettiń bir gıgabaıtynyń qunyn pakettik tarıfti negizge ala otyryp, baǵalaǵanyn aıta keteıik. Sarapshylar ár elden osy salada kóshbasshy dep sanalǵan bir operatordyń qyzmetin nazarǵa alǵan. Bul rette Qazaqstan úshin Kcell baılanys operatorynyń baǵalary qoldanyldy. Barlyq baǵalar Reseı Federatsııasy Ortalyq bankiniń 2016 jylǵy 22 aqpandaǵy baǵamy boıynsha eseptelgen.
Sonymen, Qazaqstanda mobıldi ınternettiń 1 gıgabaıtynyń quny 165 rýblge (759 teńge) baǵalanyp, elimiz atalǵan reıtıngte 9-orynǵa jaıǵasty. Bul - 2014 jylǵy qyrkúıek aıyndaǵy kórsetkishten 4 satyǵa joǵary. Alaıda, baǵalar ol kezdegiden esh ózgermegenin atap ótken jón.
Reıtıngtiń kósh basynda Iran tur. Bul elde qoldanýshylar ınternettiń 1 gıgabaıty úshin Hamrah-e-Avval operatoryna 13 rýbl (60 teńge) tóleıdi. Ekinshi orynǵa Reseı taban tiregen. Soltústiktegi kórshimizdiń «Megafon» operatory 1 gıgabaıtty 117 rýblge (538 teńge) satyp otyr. Al úzdik úshtikti Polsha túıindedi. Polıaktar T-Mobile operatorynan 1 gıgabaıtty 131 rýblge (602 teńge) satyp alady. Bul týraly «Mobıldi ınterneti arzan elder» degen materıalda basyldy.
Bas basylymda «Kenshiler qoldan qurastyrǵan alyp «BelAZ» atty maqala kópshilik nazaryna usynylyp otyr. Shyǵysqazaqstandyq kenshiler álemdegi eń úlken júk kóligi «BelAZ» mashınasyn qoldan qurastyryp shyqty. Aýyr júk kóligi óńirdegi Baqyrshyq taý-ken baıytý kásipornyna qarasty ken oryndarynyń birinde paıdalanylady.
Óskemenge atalǵan aýyr júk kóliginiń bólshekteri tórt temirjol platformasy arqyly jetkizildi. Ony qurastyrýdyń ózi eki jarym aptaǵa sozyldy. Árıne, avtozaýyttarǵa bul úırenshikti jumys bolsa, kenshiler úshin túp-tamyrymen jańa is. Qaraǵan janǵa búkil jumys úderisi LEGO qurastyrmasyn eske salady. Alaıda, bul oıynshyq emes, atan túıege júk bolarlyq aýyr bólshekter ǵoı! Máselen, dóńgelektiń dıametri 3 metrden assa, keıbir avtobólshekter 10 tonnadan da artyq salmaqqa ıe. Kólemi záýlim úıdeı júk kóliginiń ózi 135 tonnaǵa teń.
- Bir júk kóligin qurastyrýǵa orta eseppen 2,5 apta jumsalsa, 10 shaqty kúnde qoraptaǵy dánekerler jumystary aıaqtalyp, 3 aptadan keıin tolyǵymen daıyn bolady. Kólikti 100 saǵattyq júrgizip tekserýden keıin paıdalana berýge bolady, - deıdi taý-ken baıytý kásipornynyń bas dırektory ıÝrıı Ovchınnıkov.
***
«Búgingi jastyń kúnderdiń kúninde qarııa bolatyny, onyń da samaıyna aq túsetini anyq. Sondyqtan qartaıý máselesine de kóz júgirtip qoıǵanymyz artyqtyq etpes»,-dep jazady «Aıqyn» gazeti.
Máselen, BUU sarapshylary da, otandyq demograftar da Qazaqstan halqynyń qartaıyp kele jatqanyn birneshe ret aıtyp, dabyl qaqqan. Olardyń boljamy qandaı? Búginde turǵyndardyń erte qartaımaýy úshin qandaı jaǵdaı jasalyp otyr?
Mysaly, bizde gerontologııalyq jáne gerıatrııalyq máseleler áleýmettik qamsyzdandyrý, densaýlyq saqtaý, zańdyq qorǵaý, bilim berý júıesinde tıisinshe sheshildi dep aıta almaımyz. Olaı deıtinimiz, Qazaqstanda egde tartqan adamdarǵa qatysty naqty strategııalyq jospar joq. Al BUU-nyń sarapshylary Qazaqstandy tez qartaıýshy memleketterdiń qataryna jatqyzǵan. 2050 jylǵa qaraı elimizde qarttardyń sany 2,5 ese, ıaǵnı 25 paıyzǵa ósedi dep boljap otyr. Qazir elimizde orta jas - 70. Qazaqstanda halyqtyń basym bóligi, ıaǵnı 68 paıyzy 15-64 jas aralyǵyndaǵy jandar bolsa, 25 paıyzy - 0-14 jastaǵy jetkinshekter, al 7 paıyzy - 65 jáne odan úlken jastaǵylar. Biraq jasy 65-ten asqandardyń sany bizde TMD elderimen salystyrǵanda azdaý eken. Bul jaıynda «Qarııalarǵa qamqorlyǵymyz az» degen maqaladan tolyq oqı alasyzdar.
Osy basylymda «Ádebı agent - rýhanı qundylyqty nasıhattaýshy» degen taqyryppen qazaq ádebıetiniń jaýharlaryn álemge tanytýǵa talpynyp júrgen Baqtygúl Mahanbetovamen bolǵan suhbat jarııalandy.
Ádebı agent kim? Onyń atqaratyn fýnktsııasy qandaı? Elimizde ádebı agenttik damyǵan ba? Qazaq ádebıetiniń, qazaq qalamgerleriniń nasıhaty nege kemshin? Djoan Rollıngtiń bir ǵana «Garrı Potteri» avtorǵa mıllıondaǵan paıda ákeldi. Ne sebepti? Óıtkeni Rollıngtiń ádebı agentteri onyń taýar retinde qyrýar qarjy tabýyna jumys isteýde.
«Garrı Potterdi» on orap alatyn qazaqtyń kórkem ádebıeti shań basyp, baspahanada jatyr. Demek, qazaq ádebıeti tabys taba almaıdy degen sóz. Álde, biz qatelesemiz be? Marat Ahmedjanov pen Baqtygúl Mahanbetova bolsa bul salanyń jiligin shaǵyp, maıyn ishken mamandar»,-dep jazady basylym.
***
«Ekspress-K» gazetiniń búgingi sanynda «Pıatnıtsa bez tormozov» degen materıal berilgen. Ótken jylǵy jol-kólik oqıǵalaryna taldaý jasaǵan Kompetenz saqtandyrý kompanııasynyń málimdeýinshe, avtokólik ıeleri úshin aptadaǵy eń qaýipti kún retinde juma belgilenip otyr. Sonymen qatar olar júrgizýshilerdi ásirese keshqurym abaı bolýǵa shaqyrýda. JKO-lardyń basym bóligi 17:30-dan 20:00 aralyǵynda bolady eken. Al eń aýyr jol-kólik oqıǵalary 23:00-den 5:00 kezinde oryn alady, sebebi osy ýaqytta joldarda kólikter az bolǵandyqtan, júrgizýshiler jyldamdyqty shekten tys asyryp jiberedi. Munymen qosa, jaz kezinde soqtyǵysatyn kólikterdiń saldary aýyrlaý bolady eken.