Shyǵys Qazaqstannyń 10 eldimekenine gaz júrgizildi

ÓSKEMEN. QazAqparat - Bıyl Shyǵys Qazaqstan oblysynyń Zaısan aýdanyndaǵy gazben jabdyqtaý júıesine qosymsha  toǵyz eldimeken qosyldy. Bul týraly oblystyq ishki saıasat basqarmasyna silteme jasap,  QazAqparat habarlaıdy.

Memleket basshysynyń besinshi áleýmettik bastamasyn iske asyrý Shyǵys Qazaqstanda 5 jyl buryn bastalǵan. 2013 jyldyń 10 sáýirinde «Tarbaǵataı  Munaı» JShS men Shyǵys Qazaqstan oblysy ákimdigi ShQO Zaısan aýdanynyń tutynýshylary úshin Sarybulaq-Zımunaı gaz qubyrynan tabıǵı gazdy ótkizýdiń jekelegen jaǵdaıyn jasaý týraly kelisim jasasqan.

Gaz qubyry júrgiziletin tizimge Zaısan qalasy jáne taǵy 9 eldimeken:  Qaratal, Aınabulaq, Qaınar, Jambyl, Kógedaı, Shalqar, Úlken Qaratal, Qarabulaq jáne Keńsaı kirdi.

«Tarbaǵataı Munaı» JShS ókilderiniń málimetinshe, Zaısan aýdany turǵyndary úshin kógildir otyn jeńildik baǵamen satylýda - bir tekshe úshin 11,20 teńge. Bul - Qazaqstandaǵy tabıǵı gazdyń eń tómengi baǵalarynyń biri.

Búginde Zaısan 40 paıyz gazben jabdyqtalǵan, bul rette qalaǵa gazdyń berile bastaǵanyna bes jyl boldy.