Shyǵys Qazaqstanǵa zymyran «qulady»
ShQO tótenshe jaǵdaılar departamenti baspasóz qyzmetiniń málimetine súıensek, arnaıy taktıkalyq oqý-jattyǵý Glýbokoe aýdanynda ótti.
Ańyz boıynsha TJD kezekshisine «Baıqońyr» ǵarysh aılaǵynan ushqan zymyran tasyǵysh fragmentteriniń óńir aýmaǵyna qulaǵany týraly habar kelip tústi.
Sol jerge apatty jedel joıý úshin azamattyq qorǵaý qyzmetteri kelip jetti.
Sonymen qatar oblystyq jáne aýdandyq ákimdikte tótenshe jaǵdaılar jónindegi komıssııalardyń shuǵyl otyrysy ótkizildi.
Qoǵamdyq tártipti qorǵaý qyzmeti zymyran tasyǵyshtyń qulaǵan jerin túgel qorshap tastady.
TJ aımaǵyndaǵy aýyl turǵyndary qalyptasqan jaǵdaı týraly sıgnaldyq-daýys qurylǵylarymen jabdyqtalǵan avtokólikterdiń kómegimen habardar etildi.
Qutqarýshylar turǵyndar men janýarlardy oqıǵa ornynan evakýatsııalady. Tarhanka aýylynyń halqy ornalastyrý pýnktine jetkizildi.
Onda azamattarǵa úsh ýaqyt ystyq tamaq pen birinshi kezekte qajetti zattar berildi. Evakýatsııalanǵan halyqpen psıhologtar jumys júrgizdi.
Órt sóndirýshiler qyzyl jalyn oshaqtaryn tolyqtaı aýyzdyqtady.
Jergilikti atqarýshy organ ókilderi TJ aımaǵynda hımııalyq zaqymdaný deńgeıin anyqtaý jáne apat aýmaǵyn qalpyna keltirý jumystaryn uıymdastyrdy.
«Taktıkalyq arnaıy oqý-jattyǵýǵa jeke quramnan 30 adam men 10 tehnıka jumyldyrylǵan. Mundaǵy basty maqsatymyz – zymyran tasyǵyshtan bolǵan tótenshe jaǵdaıdyń saldaryn joıýǵa azamattyq qorǵaý qyzmetteriniń deńgeıin arttyrý», - deıdi oblystyq TJD bastyǵynyń orynbasary Dmıtrıı Tıtov.