Shyǵys Qazaqstandaǵy mektepter dástúrli formatta oqýǵa daıyn ba
Sanıtarlyq talaptar qatań saqtalǵan
Koronavırýs pandemııasyna baılanysty byltyr oqýshylar qashyqtan bilim aldy. Al 2021-2022 oqý jyly oflaın ótetin boldy. Osy jańalyqty estigen Shyǵys Qazaqstandaǵy mektepterdiń ujymy qyzý daıyndyq jumystaryna kirisken. Búginde óńirdegi 647 mektepte 198 624 oqýshy bar.
ShQO Sanıtarlyq-epıdemıologııalyq baqylaý departamentiniń málimetine súıensek, barlyq mektep baılanyssyz termometrlermen, bakterıtsıdti shamdarmen, sanıtaızerlermen, dezınfektsııalyq kilemshelermen, maskalarmen jáne dezınfektsııalyq quraldarmen tolyqtaı qamtamasyz etilgen.
«Bilim ordalarynyń 100 paıyzynda «Ashyq» qosymshasy engizilgen. 543 mektepte medıtsınalyq kabınet bar. Al osyndaı kabıneti joq aýyl mektepteriniń oqýshylaryna medıtsınalyq pýnktterdiń jáne dárigerlik ambýlatorııalardyń aq halattylary qyzmet kórsetedi», - dep habarlady departamenttiń baspasóz qyzmeti.
Mektepter sanıtarlyq-epıdemıologııalyq talaptardy qatań saqtaı otyryp, oqytýdyń birneshe formatynda jumys isteıdi. Atap aıtqanda, dástúrli, aralas jáne qashyqtan. Birinshi synypqa baratyn balalar úshin 1 qyrkúıekte dástúrli túrde alǵashqy qońyraý soǵylady. Al 2-11 synyptarǵa QR Táýelsizdiginiń 30 jyldyǵyna arnalǵan «Táýelsizdiktiń jetistikteri» taqyrybynda biryńǵaı synyp saǵaty ótkizilmek.
Jańa tósbelgi jáne qomaqty syıaqy
«Muǵalimderdiń júktemesi 18-den 16 saǵatqa deıin tómendeıdi. Al sabaqtyń uzaqtyǵy 45 mınýt bolady. Barlyq bilim berý uıymdarynda tsıfrlyq platformalarǵa qoljetimdilik qamtamasyz etiledi. Mysaly, 1-11 synyp oqýshylary QR Bilim jáne ǵylym mınıstrligi usynǵan mazmundy platformalardy paıdalanatyn bolady», - dedi ShQO Bilim basqarmasynyń basshysy Saırangúl Jumadilova.
Onyń aıtýynsha, bıylǵy oqý jylynda óńir ákiminiń atynan alǵash ret pedagogtarǵa «Shyǵys Qazaqstan oblysynyń bilim berý isine qosqan úlesi úshin» qurmetti ataǵy, 600 myń teńge aqshalaı syıaqy jáne «ShQO eńbek sińirgen ustazy» tósbelgisi beriledi. Osyndaı marapattardy bilim berý júıesine úlken úles qosqan pedagogtar ıelenbek.
Ótken jyly «Pedagog mártebesi týraly» zań qabyldanǵany belgili. Bul ustazdardyń eńbek jaǵdaıyn jaqsartýǵa jáne jalaqysyn arttyrýǵa múmkindik berdi. Búgingi tańda oblystaǵy 24 045 pedagogtyń 13 916-sy jańa format boıynsha attestattaýdan ótip, óz jalaqysyn 30%-dan 50%-ǵa deıin kóterdi. Ótken oqý jylynan bastap alǵash ret 800 pedagog magıstratýraǵa 26 myń teńge kóleminde qosymsha aqy aldy», - deıdi Saırangúl Jumadilova.
Jańa oqý jylynan bastap pedagogtardy jumysqa qabyldaý júıesi ózgeredi. Eger buryn jumysqa dırektor alsa, endi tıisti biliktilik talaptaryna sáıkes konkýrs elektrondy formatta ótkiziletin bolady.
«Qyrkúıek aıynan bastap bilim berý uıymdarynyń dırektorlaryn taǵaıyndaýdyń jańa júıesi engiziledi. Bul birinshi basshylarǵa qoıylatyn biliktilik talaptaryna sáıkes júrgiziledi. Pedagogıkalyq qyzmetke alǵash kirisetin JOO túlekteri de «Pedagog» biliktiligin alý úshin Ulttyq biliktilik testinen ótýi tıis», - dedi basqarma basshysy.
Jýyqta oblys ákimdiginde ótken jıynda aımaq basshysy Danıal Ahmetov keıbir mektepterde oqýshy tasymalynyń birshama qıyndyq týdyryp otyrǵandyǵyn aıtty.
«Oqýshylardy mektepke jetkizý óte ózekti máselelerdiń biri. Búgingi tańda 134 bilim berý mekemesinde osyndaı qıyndyq bar. Bıyl qosymsha 26 avtobýs satyp aldyq. Bilim basqarmasyna jaǵdaıdy taldap, taǵy qansha avtobýs qajettigi týraly aqparat berýdi tapsyrdym», - dedi oblys ákimi.
Qoryta aıtqanda, mektepter jańa oqý jylyna daıyndyq jumystaryn aıaqtaǵan. Sanıtarlyq talaptar tolyqtaı eskerildi. Sondaı-aq oqytýshylar men tehnıkalyq qyzmetkerlerdiń 100 paıyzy COVID-19 ınfektsııasyna qarsy vaktsına aldy. Sebebi balalardyń densaýlyǵy – árkez birinshi orynda.