Shyǵys Qazaqstandaǵy eki aýdanda pishen órtendi

ÓSKEMEN. QazAqparat – Shyǵys Qazaqstan oblysyndaǵy eki aýdanda pishen órtendi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Úrjar aýdanyndaǵy jeke turǵyn úı aýlasynda pishen órtengen. Tilsiz jaý saraıdyń aǵash konstrýktsııalaryna jaıylyp ketti.

«Oqıǵa ornyna qutqarýshylar shuǵyl kelip jetti. Kóp uzamaı jalpy aýdany 70 sharshy metrdi quraǵan tilsiz jaý tolyqtaı aýyzdyqtaldy», - dep habarlady vedomstvo ókilderi.

Budan bólek, Tarbaǵataı aýdanynda 40 tonna shóp janǵan. Órt sóndirýshiler jalyndy jyldam óshirdi.

Kóp jaǵdaıda pishen órtenýiniń negizgi sebepteri – otty abaısyz paıdalaný jáne órt qaýipsizdigi talaptaryn saqtamaý.