Shyǵys Qazaqstandaǵy beıorganıkalyq óndiris zaýyty qaıta jandanady

ÓSKEMEN. QazAqparat – Shyǵys Qazaqstan oblysy Altaı aýdanyndaǵy Serebrıansk beıorganıkalyq óndiris zaýytynyń jumysy qaıta jandanbaq, dep habarlaıdy QazAqparat tilshisi.

Aımaq basshysy Danıal Ahmetov jumys saparymen Altaı aýdanyna bardy. Aýdan ákiminiń esebin tyńdap, jurtshylyqpen kezdesý ótkizdi.

«Búginde Altaı agrosektorda kúnbaǵys, raps jáne basqa da daqyldardy ósirýde jetekshi orynda. Mal sharýashylyǵynda da kórsetkishter jaman emes. Ótken jyly TÚKSh salasynda, atap aıtqanda joldardy jóndeý, kóshelerdi jaryqtandyrý jáne jylýmen jabdyqtaý boıynsha birneshe joba iske asyrylǵan. Qazir eldi mekenderde sý tasqynynyń aldyn alýǵa qatysty sharalar júrgizilýde», - dedi oblys ákimi.

Onyń aıtýynsha, basty mindetterdiń biri – «Ertis» ÁKK quramyna berilgen, qala úshin mańyzy zor Serebrıansk beıorganıkalyq óndiris zaýytyn qaıta jandandyrý.

«Burynǵy aýdan ortalyqtaryn damytýdyń oblystyq baǵdarlamasyna engen bul qalanyń damýyna ınfraqurylymdy jaqsartý úshin qomaqty qarajat bólinýde. Jaqyn arada Altaıda gemodıalız bólimshesi ashylady. Sondaı-aq bıyl zamanaýı fıtnes ortalyǵynyń qurylysyn bastaý kózdelip otyr», - dedi Danıal Ahmetov.