Shyǵys Qazaqstanda Jastar ortalyǵy boı kóteredi

ÓSKEMEN. QazAqparat – Shyǵys Qazaqstan oblysy Besqaraǵaı aýdanynda Jastar ortalyǵy salynady. Bul týraly aımaq basshysy Danıal Ahmetovtiń qatysýymen ótken 2020 jylǵy áleýmettik-ekonomıkalyq damý týraly aýdan ákiminiń onlaın-esep berý kezdesýinde aıtyldy, dep habarlaıdy QazAqparat tilshisi.

Besqaraǵaı aýdanynyń ákimi Shalqar Baıbekov eldi mekenderdi damytý baǵdarlamasy aıasynda Jastar ortalyǵy men avtobeket salynyp, «Besqaraǵaı-Boztal» jáne «Besqaraǵaı-Qoıanbaı» baǵyttary boıynsha aýdanishilik marshrýttar ashylatynyn atap ótti. Budan bólek, aýdanda eki páterli 20 úı boı kóterip, Qaraǵaıly, Dolon jáne Qarabas aýyldarynda sýmen jabdyqtaý boıynsha úsh joba aıaqtalady.

«Glýhovka, Jetijar, Bódene, Mostık jáne Ernazar aýyldarynda sý qubyrlarynyń qurylysy bastalady. 12 kósheniń ortasha jóndeýi aıaqtalyp, alty kóshege jaryq ornatylady. Sondaı-aq Mostık jáne Qoıanbaı aýyldary uıaly baılanyspen qamtamasyz etiledi», - dedi Shalqar Baıbekov.

Jıyn barysynda aýdan turǵyndary tolǵandyryp júrgen saýaldaryn qoıyp, tuşymdy jaýap aldy.

Besqaraǵaı aýdanyndaǵy aýyldardyń 75 paıyzy aýyzsýmen qamtamasyz etilgen. Bul óte jaqsy kórsetkish. Jalpy oblys boıynsha 2024 jylǵa deıin barlyq eldi mekenderdi aýyzsýmen qamtamasyz etý mindetin qoıyp otyrmyz», – dep qorytyndylady aımaq basshysy Danıal Ahmetov.