Shyǵys Qazaqstanda ıogýrttyń jańa túri óndiriledi
ShQO-da sońǵy jyldary sút óndirý salasy qarqyndy damýda. Oblystyń sút ónimderin shyǵarý boıynsha elimizde kóshbasshy óńirge aınalýǵa áleýeti jetedi.
«Jergilikti óndirýshilerdiń taýarlary Shyǵys Qazaqstanda ǵana emes, basqa óńirlerde, Almaty men Nur-Sultan qalalarynda satylymǵa shyǵarylyp, tutynýshylardyń oń baǵasyn aldy. Sońǵy bes jyl ishinde halyqtan sút jınaý 17 esege artyp, tabıǵı ekvıvalent kórsetkishi 13 esege kóbeıdi. Aldaǵy ýaqytta bul baǵyttaǵy jumystar jalǵasyn tabady», - dep habarlady ShQO Aqparat ortalyǵy.
Aımaq basshysy Danıal Ahmetovtiń aıtýynsha, bıyl 153 myń tonnaǵa deıin sút óńdelip, kásiporyndardyń júktemesi 87%-ǵa jetedi dep josparlanyp otyr.
Aıta keteıik, bes jyl buryn bul kórsetkish – 29% bolǵan. Halyqqa túsindirý jumystary júrgizilip, sút kooperatıvteri qurylyp, zamanaýı jáne klassıkalyq úlgidegi sút-taýarly fermalar qurylyp, joǵary tehnologııalyq quraldar engizilgen soń bul kórsetkish 3 esege artty.
Júrgizilgen taldaýdyń nátıjesinde bólingen 22 mıllıard teńge halyqtyń qajettiligin jabýǵa jetpeıtini anyqtaldy. Óıtkeni dúken sórelerinde jergilikti óndirýshilerdiń ónimderimen qatar, kórshiles aımaqtar men Reseı Federatsııasynan kelgen ónimder turady. Sondyqtan basty mindet ıogýrt pen irimshiktiń túrlerin óndirýdi arttyrýǵa tireledi.
«Bul úshin jyl saıyn qosymsha 228 myń tonna sút pen óńdeý isiniń kólemin eki jarym esege arttyrý kerek. Sondaı-aq sút-taýarly fermalardy salýǵa kóńil bólinedi. Máselen, bıyl osyndaı 2 ferma salyndy. Josparǵa sáıkes 5 sút qabyldaý pýnktiniń 4-eýi ashyldy. Jalpy Shyǵys Qazaqstanda sút óńdirý salasyn damytý baǵdarlamasynyń kórsetkishi jaman emes. Óńir joǵary sapaly tabıǵı sút ónimderimen óńir turǵyndaryn ǵana emes, Qazaqstannyń ózge oblystaryn da qamtamasyz ete alady», - delingen málimette.