Shyǵys Qazaqstanda toǵanda balyq jappaı qyryldy

ÓSKEMEN. QazAqparat – Shyǵys Qazaqstan oblysy Glýbokoe aýdanyndaǵy toǵanda balyq qyryldy, dep habarlaıdy QazAqparat tilshisi.

Balyq sharýashylyǵy komıtetiniń Zaısan-Ertis oblysaralyq basseındik balyq sharýashylyǵy ınspektsııasynyń málimetine súıensek, Ýshanov aýylynda ornalasqan toǵanda balyq jappaı qyrylǵan.

«Toǵannyń aýmaǵy 1,8 gektardy quraıdy. Oqıǵa ornyna birden ınspektsııa mamandary baryp, monıtorıng júrgizdi. 40 keli óli móńke balyq jınaldy. Sondaı-aq zertteý jumystaryn júrgizý úshin balyq pen sýdan synama alynǵan», - delingen aqparatta.

Mamandar ottegi men temperatýra kórsetkishterine ólshemder jasady.

Jınalǵan balyq sanıtarlyq normalarǵa sáıkes kádege jaratylǵan.