Shyǵys Qazaqstanda taǵy bir orman órtenip jatyr

ÓSKEMEN. QazAqparat – Shyǵys Qazaqstan oblysynyń Katonqaraǵaı aýdanynda orman órtenip jatyr, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 17 maýsymda Katonqaraǵaı aýdanyndaǵy «Katonqaraǵaı ulttyq tabıǵı parki» RMM Aqsý fılıalynyń aýmaǵynda (Ýst-ıAzovskoe ormanshylyǵy) jetýi qıyn taýly jerde órt shyqqan. Qyzyl jalyn shóp pen butalardy sharpyp jatyr.

Aldyn ala derek boıynsha tilsiz jaý taraǵan aýmaq – 15 gektar. Órtti sóndirýge «Qazavıaormandy qorǵaý» qyzmetkerleri, ormanshylar, jergilikti atqarýshy organdar, TJD órt sóndirýshileri jumyldyryldy.

«Barlyǵy 111 adam, 3 tehnıka jáne ShQO ákimi apparatynyń áýe bólimshesiniń 2 tikushaǵy jumys isteýde. Jalynmen kúreske jumyldyrylǵan adamdar sol jerge tikushaqpen jetkizildi, óıtkeni jer bederi avtotehnıkamen júrýge múmkindik bermeıdi. Eldi mekenderge qaýip tónip turǵan joq», - delingen aqparatta.

Eske salsaq, keshe Rıdderdegi qoryqta órt shyqqan bolatyn. Búgin saǵat 06.45-te tilsiz jaýdyń beti qaıtty.