Shyǵys Qazaqstanda sý tasqyny qaýpi bar eldi mekenderge monıtorıng júrgizilýde

ÓSKEMEN. QazAqparat – Shyǵys Qazaqstan oblysynda sý tasqyny qaýpi bar eldi mekenderge monıtorıng júrgizilýde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men Glýbokoe aýdanynyń ákimdigi sý tasqyny qaýpi bar eldi mekenderge monıtorıng júrgizdi. Aýdanda búgingi tańda jerdiń qatý tereńdigi – 48 sm, qar jamylǵysynyń bıiktigi – 134 sm.

Glýbokoe aýdanynda sý basý qaýpi joǵary 15 eldi meken bar. Atap aıtqanda, Praporşıkovo, Ývarovo, Glýbokoe, Kamennyı karer, Beloýsovka, Novo-Ýlbınka, Tarhanka, Altaı, Progress, Predgornoe, Razezd, Cheremshanka, Ýshanovo, Maloýbınka jáne Opytnoe pole aýyldary. Ondaǵy barlyǵy 92 úıde 2335 adam turady.

«Qazirgi ýaqytta sý tasqyny kezeńine daıyndyq jumystary júrgizilýde. Aýdanda 6,6 myń tekshe metr qar shyǵarylǵan. Avtokólik joldaryndaǵy 34 sý ótkizý qurylysy, 14 shaqyrym kanaldar jáne 22,3 shaqyrym aryqtar qar men muzdan tazartyldy. 9200 dana ydys-qap, 100 tonna ınertti materıal, 1,6 tonna janar-jaǵarmaı daıyndaldy. Sondaı-aq tótenshe jaǵdaı bolyp jatsa halyqty evakýatsııalaý úshin ýaqytsha ornalastyrý pýnktterin uıymdastyrdyq. Gıdrologııalyq jaǵdaı turaqty», - deıdi Glýbokoe aýdanynyń ákimi Eldar Týmashınov.

Qutqarýshylar árbir úıdi aralap, sý basý qaýpi tóngen jaǵdaıda qalaı áreket etý kerektigin túsindirýde.

Eske salsaq, osyǵan deıin ShQO-daǵy 13 jol ýchaskesin sý basý qaýpi bar ekendigi habarlanǵan.