Shyǵys Qazaqstanda shetelge ketetin túlekterdiń sany azaıdy

ÓSKEMEN. QazAqparat – Shyǵys Qazaqstan oblysyndaǵy mektep bitirýshiler arasynda shetelge oqýǵa ketetinder azaıyp keledi, dep habarlaıdy QazAqparat tilshisi.

Aımaq basshysy Danıal Ahmetovtyń bastamasymen qolǵa alynǵan «Bilikti maman» jobasynyń nátıjesinde óńirde shetelde bilim alǵysy keletin túlekterdiń sany tómendegen. Bul týraly ShQO aqparat ortalyǵynda ótken baspasóz brıfıngi barysynda oblystyq bilim basqarmasynyń basshysy Saırangúl Jumadilova málimdedi.

«Bıyl Óskemen men Semeı qalalaryndaǵy mektep túlekteriniń 394-i shetelde oqýǵa nıet bildirdi. Olardyń mundaı tańdaý jasaýyna otbasymen birge ózge elge qonys aýdarýy sebep bolyp otyr. Rıdder, Kýrchatov qalalary men Shemonaıha, Altaı aýdandaryndaǵy túlekterdiń shetelge ketýi burynǵy jyldarmen salystyrǵanda edáýir azaıdy», - dedi ol.

Onyń aıtýynsha, búginde mektep bitirýshilerdiń 40 paıyzdan astamy oblystaǵy oqý oryndarynda bilim alǵysy keledi. Qalǵandary elimizdiń ózge aımaqtaryna oqýǵa túsýdi kózdep otyr.

Esterińizge sala ketsek, osyǵan deıin ShQO túlekteriniń UBT-ny 16 ótkizý pýnktinde tapsyratyny habarlanǵan.