Shyǵys Qazaqstanda sharýa qojalyǵynda 500 tonna pishen janyp ketti

ÓSKEMEN. QazAqparat – Shyǵys Qazaqstan oblysy Ulan aýdanyndaǵy sharýa qojalyǵynda 500 tonna pishen janyp ketti, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, Ulan aýdanyndaǵy sharýa qojalyǵynda ashyq alańǵa jınalǵan pishen otqa oranǵan.

«Oqıǵa ornyna órt sóndirýshiler shuǵyl kelip jetti. TJD men jergilikti atqarýshy organ tarapynan 14 adam men 6 tehnıka tartylǵan. Barlyǵy 500 tonna pishen janyp ketti», - delingen aqparatta.

Qazirgi ýaqytta jalynnyń naqty neden shyqqany belgisiz. Departament qyzmetkerleri sony anyqtaý úshin tıisti sharalardy júrgizýde.

Osy rette, qutqarýshylar kóp jaǵdaıda pishen órtenýine ne sebep bolatyndyǵyn aıtty.

«Uzaq jyldyq tájirıbe kórsetkendeı, maldyń jem-shóbi qorshalmaǵan jerlerge jáne elektr jelileriniń astyna jınalyp jatady. Sonyń saldarynan órt shyǵyp, adamnyń kóp kúndik eńbegin áp-sátte joıady. Pishen óte jyldam órtenedi. Sol úshin únemi mańaıda órt sóndirgish qural bolýy tıis. Pishen elektr jelilerine 15 metr, ǵımarattar men qurylystarǵa deıin keminde 50 metr qashyqtyqta ornalasýy qajet», - dep eskertti vedomstvo ókilderi.

Eske salsaq, osyǵan deıin ShQO-da bıyl shóp az ósip, sharýalar jem-shóptiń quny aıtarlyqtaı qymbattap ketkenine shaǵymdanǵanyn jazǵan edik.