Shyǵys Qazaqstanda orta ǵasyrlyq qalashyqtyń orny tabyldy

ÓSKEMEN. QazAqparat – Shyǵys Qazaqstan oblysy Zaısan aýdanynyń aýmaǵynan orta ǵasyrlyq qalashyqtyń orny tabyldy. Bul jaıly QazAqparat tilshisine belgili arheolog Ábdesh Tóleýbaı málimdedi.

Arheologtyń aıtýynsha, kóne shahardyń orny Qaratal aýylyna qarasty Jińishke ózeniniń boıy men Sarjyra aýylynyń mańynan tabyldy. Alaıda onyń naqty qaı kezeńge jatatynyn dóp basyp aıtýǵa erte.

«Orta ǵasyrlyq qalashyq 5 ǵasyr men 12 ǵasyrǵa deıingi aralyqqa tıesili bolýy múmkin. Osy Zaısan aýdanyndaǵy Sarjyra degen jerden de qalashyq tabylǵan. Ekeýiniń aralyǵy - shamamen 25-30 shaqyrym. Qalashyqtardan qysh qumyra synyqtary, qurylysqa paıdalanǵan shaqpaq tastar, mys ydystardyń synyqtary, mys pyshaq, tastan oıylyp sheber jasalǵan áshekeı buıymnyń qaldyqtary tabyldy. Buny áıgili Jibek jolynyń kishigirim bir tarmaǵy dese de bolady. Negizgi jol Jońǵar qaqpasyna qaraı ketedi. ıAǵnı, Jetisýdan bastalady. Ekinshi bir tarmaǵy Tarbaǵataıdy bókterlep, Aqsýat, odan ary Zaısan, odan Jemeneı, qara Ertistiń boıymen Qytaıǵa qaraı ótken. Osy jolda qala jurttary, qonys oryndary tabylyp jatyr», - deıdi Ábdesh Tóleýbaı.

Onyń sózinshe, endi qazba jumystary júrgiziledi. Qalashyqtyń naqty kezeńi sol kezde belgili bolmaq.

Aıta keteıik, arheolog Ábdesh Tóleýbaı Zaısan aýdany Shilikti aýylynan úshinshi «Altyn adamdy» tapqan.