Shyǵys Qazaqstanda qaıda baryp balyq aýlaýǵa bolady

ÓSKEMEN. QazAqparat – Qaıyqqa minip, qarmaq ustaýdy janyńyz súıse, Shyǵys Qazaqstanda ishińiz pyspaıdy. Ózen-kólge baı ólkede balyq aýlaıtyn jer kóp. Osy maqalada sizderdi solardyń birnesheýimen tanystyrmaqpyz, dep habarlaıdy QazAqparat tilshisi.

Zaısan-Ertis oblysaralyq basseındik balyq sharýashylyǵy ınspektsııasynyń málimetine súıensek, áýesqoı balyqshylar bes kelige deıin balyqty tegin aýlaýǵa quqyly. Ol úshin Ertis ózenine nemese Buqtyrma sý qoımasyna barýǵa bolady.

Sonymen qatar Shyǵys Qazaqstan oblysy ákimdiginiń qaýlysymen balyq aýlaýǵa ruqsat etilgen rekreatsııalyq aımaqtar bar. Biraq onda da ózińizben bes keliden artyq balyqty ákete almaısyz. Osyndaı aımaqqa Zaısan jáne Sibe kólderi jatady. ıAǵnı, bul jerlerde eshqandaı ruqsat qujattaryn rásimdemeı, joldama almaı-aq balyq aýlaýǵa ruqsat etilgen.

Sý aıdyndarynda ózderine bekitilgen ýchaskeleri bar kompanııalar da áýesqoı balyqshylardy qarsy alýǵa daıyn. Olarǵa barý úshin joldama satyp alý kerek.

Sonymen qatar qarmaq pen kerek-jaraqty ózderi beretin, alańsyz baryp balyq aýlap qaıtýyńyzǵa bar múmkindikti jasaıtyn arnaıy bazalar da bar.

Máselen, Óskemen qalasynan 34 shaqyrymdaı jerdegi Taýly Úlbi aýylyndaǵy demalys ornyna apta saıyn, juma, senbi jáne jeksenbi kúnderi kelýge bolady. Kólik turaǵynyń aqysy – 1000 teńge. Tólem aýlanǵan balyqtyń salmaǵyna qaraı esepteledi. Foreldiń kelisi – 4 500 teńge. Qarmaqty jaldaý baǵasy – 1000 teńge, balyqqa jem – 800 teńge. Al sý jaǵasynda ústeldi jalǵa alý úshin eki saǵatqa 2500 teńge tóleısiz.

Salystyrmaly túrde Ulan aýdany Saratovka aýylynyń mańyndaǵy balyqshylarǵa arnalǵan demalys ornynyń baǵalaryna kóz júgirtip kórelik. Munda kólik turaǵy tegin. Jumys kúnderi de ashyq bolady. Qarmaqty jalǵa alý úshin 1000 teńge tóleısiz.

Al balyqtyń baǵasyna qatysty aıtar bolsaq, sazannyń kelisi 1000 teńge, bekire – 5000 teńge, forel – 3500 teńge. Іshinde ydys-aıaq pen sháınegi bar úı-jaıdy jalǵa alý baǵasy táýligine 20 000-25 000 teńge.