Shyǵys Qazaqstanda karantın talabyn saqtamaıtyndar áli de tyıylmaı tur

ÓSKEMEN. QazAqparat – Shyǵys Qazaqstan oblysynda shekteý sharalaryn buzǵandarǵa aıyppul salynýda, dep habarlaıdy QazAqparat tilshisi.

Óńirde arnaıy qurylǵan monıtorıngilik toptar karantın talaptarynyń saqtalýyn qadaǵalaý úshin qoǵamdyq kólikterde, dúkenderde, dárihanalar men basqa da mekemelerde kún saıyn reıd júrgizýde.

6 sáýir kúni Semeıde 316 nysan tekserilgen. Nátıjesinde karantın talabyn buzýdyń 4 faktisi anyqtaldy. Sondaı-aq buryn tirkelgen buzýshylyqtar boıynsha 350 040 teńge mólsherinde 8 aıyppul óndirilip, 393 795 teńge somasyna 9 hattama toltyrylǵan», - delingen ShQO Aqparat ortalyǵy taratqan málimette.

Kýrchatov qalasynda tekserý barysynda 26 nysan qamtylǵan. Shekteý sharalaryn buzǵan 1 adam tirkeldi. Shemonaıha aýdanynda monıtorıngilik toptar 71 nysandy aralap, maska rejımin buzýdyń 3 faktisin anyqtady.

Sondaı-aq Glýbokoe aýdanynda 114 nysanǵa tekserý júrgizildi. Nátıjesinde, maska rejımin buzýdyń 1 faktisi tirkelgen.