Shyǵys Qazaqstanda qar kóshkininiń aldyn alý úshin 2 jarylys jasaldy

ÓSKEMEN. QazAqparat – Shyǵys Qazaqstan oblysynda jasandy jolmen qar túsirildi, dep habarlaıdy QazAqparat tilshisi.

Oblystyq Tótenshe jaǵdaılar departamenti baspasóz qyzmetiniń málimetine súıensek, «Qazseldenqorǵaý» ShQ fılıalynyń mamandary júrgizgen monıtorıngten keıin kóshkin qaýpi bar taý bókterinde qardyń mol jınalǵany belgili boldy.

«Qaýipsizdikti qamtamasyz etý maqsatynda «Óskemen-Altaı» tasjolynda jasandy jolmen qar túsirý jaıly sheshim qabyldandy. Taýda 2 jarylys jasalyp, sonyń nátıjesinde 2050 tekshe metr qar túsirildi. Qar joldy tolyqtaı jaýyp qaldy. Birden qardy tazalaý jumystary júrgizildi», - dep habarlady vedomstvo ókilderi.

Aıta keteıik, Shyǵys Qazaqstanda barlyǵy qar kóshkini júrýi múmkin 497 ýchaske bar, onyń ishinde 325-inde qaýip joǵary.

Qys bastalǵaly beri qutqarýshylar qar kóshkini jaǵdaıyna táýlik boıy monıtorıng júrgizýde.

Foto: ShQO TJD baspasóz qyzmeti