Shyǵys Qazaqstanda qar kóshkini túsirildi
20:22, 16 Aqpan 2023
ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirildi, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, qar kóshkininiń aldyn alý sharasy «Óskemen-Tarǵyn» tasjolynyń ýchaskesinde júrgizildi.
«Qazseldenqorǵaý» ShQ fılıalynyń mamandary men qutqarýshylar taý bókterinde 2 jarylys jasady. Sonyń nátıjesinde 3000 tekshe metr qar túsirildi. Qar joldy tolyqtaı jaýyp qaldy. Kóp uzamaı jol qardan tolyqtaı tazartyldy», - delingen aqparatta.
Shyǵys Qazaqstanda qys bastalǵaly beri 64 ret taýda jarylys jumystary júrgizilip, 256 110 tekshe metr qar túsirilgen.
Osy rette, TJD qyzmetkerleri óńir halqyna qar kóshkini qaýpi áli de saqtalatyndyqtan taýly jerlerge barmaýǵa keńes berdi.
Foto: ShQO TJD baspasóz qyzmeti