Shyǵys Qazaqstanda bıyl ınternet alaıaqtyq 22% artty

ÓSKEMEN. QazAqparat – Shyǵys Qazaqstan oblysynda bıyl ınternet alaıaqtyq faktileri 22% artyp otyr, dep habarlaıdy QazAqparat tilshisi.

ShQO prokýratýrasy baspasóz qyzmetiniń málimetine súıensek, jyl basynan beri óńirde alaıaqtyq boıynsha 1131 qylmys tirkelgen.

Onyń ishinde 763-i ınternet arqyly jasalǵan.

«Bıyl ınternet alaıaqtyq ótken jylǵy kezeńmen salystyrǵanda 22%-ǵa artty. Barlyǵy 1500-den astam adamǵa 600 mln teńge mólsherinde materıaldyq zalal keltirildi. Sońǵy kezde ınternet-alaıaqtyqtyń ósýine ІT-tehnologııalardyń qarqyndy damýy, qyzmetterdi tsıfrlandyrý, ınternettegi taýarlar men qyzmetterdi satý naryǵynyń belsendiligi áser etti», - delingen aqparatta.

Jábirlenýshilerdiń jartysyna jýyǵy 30-49 jas aralyǵyndaǵy jumys isteıtin azamattar. 31% jaǵdaıda 50-60 jastaǵy adamdar aldanyp qaldy. Al 18-29 jas aralyǵyndaǵy jastar alaıaqtardyń shyrmaýyna kóp túse bermeıdi (20%).

«Instagram jelisinde joǵary kiristi ınvestıtsııa salý jónindegi jarnama – alaıaqtyqtyń jańa túri. Óskemende «QazMunaıGaz» AQ atrıbýtıkasyn paıdalanýyna baılanysty 13 qylmystyq is tirkelgen. Búginde óńir boıynsha alaıaqtyq týraly 419 qylmystyq is ashylmaǵan kúıde qalyp otyr» delingen habarlamada.

Ádette, alaıaqtar aqshany alǵan soń, óz telefondaryn óshirip, áleýmettik jelilerden joǵalyp ketedi.

Azamattar sodan keıin ǵana aldanyp qalǵanyn bilip, quqyq qorǵaý organdaryna júginedi. ıAǵnı, birshama ýaqyt ótip ketedi.

«Osyǵan baılanysty profılaktıkaǵa basty nazar aýdaryp, halyqqa aýqymdy túsindirý jumystaryn júrgizý qajet. Azamattar saq bolýy tıis. Lezde paıda tabýdy ýáde etetin nemese arzan taýarlar men qyzmetterdi jarnamalaıtyn kúmándi habarlandyrýlarǵa senip qalmaýy kerek», - deıdi oblys prokýrory Almat Baısholaqov.