Shyǵys Qazaqstanda bıyl 6800 túlek UBT tapsyrady

ÓSKEMEN. QazAqparat – Shyǵys Qazaqstan oblysynda bıyl 6800 túlek Ulttyq biryńǵaı testileýge qatyspaq, dep habarlaıdy QazAqparat tilshisi.

Elimizde 6 mamyrdan UBT tapsyrý kezeńi bastaldy. Shyǵys Qazaqstannan 6 864 túlek joǵary oqý oryndaryna granqa túsý úshin testileýge qatysady.

Osy rette oblystyq bilim sapasyn baqylaý departamentiniń ókilderi testileý kezinde baqylaýshylar tizimine engizilgen.

Departament basshysy Zeınep Maqsutovanyń aıtýynsha, talapkerler UBT-ny eki ret tapsyra alady, al testileýdiń kúni men ýaqytyn ózderi tańdaıdy.

Grant konkýrsyna qatysý úshin úmitkerler eń jaqsy nátıjesin usynady.

«Talapkerler testileýdi artyq daý-damaısyz tapsyrý úshin buryn-sońdy bolmaǵan jaǵdaılar jasaldy. Taǵy bir artyqshylyǵy – UBT nátıjesi testileý aıaqtalǵannan keıin birden kórinedi. Sondaı-aq qatysýshy ózi durys jaýap bermegen suraqtardy birden kóredi», - dedi ol.

Testileý nátıjelerimen kelispegen jaǵdaıda, talapker kelesi kúndi kútpeı-aq sol jerde elektrondy shaǵym jibere alady.

Qazirgi ýaqytta testileýge 1780 adam qatysqan. Belgilengen erejelerdi buzǵany úshin 16 adam shyǵaryldy.