Shyǵys Qazaqstanda bıyl 200-ge jýyq adamǵa MÁMS aıasynda ota jasaldy
«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, óńir turǵyndary úshin bıyl ambýlatorııalyq-emhanalyq deńgeıdegi medıtsınalyq qyzmetter áldeqaıda qoljetimdi bola bastaǵan. Sonymen qatar kúndizgi statsıonarlardy, aýyldaǵy medıtsınalyq mekemelerdi jáne onkogematologııany damytýdy qarjylandyrý artty.
«Qor tarapynan erekshe qajettilikteri bar balalardy medıtsınalyq ońaltý boıynsha «Qamqorlyq» jáne EKO kvotalaryn ulǵaıtý maqsatynda iske qosylǵan «Ańsaǵan sábı» baǵdarlamalaryna qarajat bólinýde. 2021 jylǵa arnalǵan halyqqa medıtsınalyq kómek kórsetý boıynsha 120 mlrd teńge qarastyrylǵan. Onyń ishinde memleket kepildik bergen medıtsınalyq kómekke – 72,6 mlrd teńge jáne MÁMS paketindegi qyzmetterge – 47,2 mlrd teńge jumyldyryldy», - dedi fılıal dırektory Ǵalymjan Ábilov.
Onyń aıtýynsha, oblysta halyqqa kórsetilgen medıtsınalyq qyzmetterdiń sany artty. Máselen, emhana deńgeıinde konsýltatsııalyq-dıagnostıkalyq kómek kólemi 63%-ǵa ósken. Bul saqtandyrylǵan halyq úshin kezekti qysqartýǵa jáne tegin tekserýlerge jyldam joldama berýge múmkindik berdi.
«Jalpy bıyl aımaq turǵyndary úshin 6,4 mlrd teńgege 3,7 mln qyzmet kórsetildi. Bul ótken jylmen salystyrǵanda 1 mln-ǵa artyq. Sonymen qatar qor qarajaty esebinen 197 adamǵa túrli ota jasalǵan», - deıdi Ǵalymjan Ábilov.