Shyǵys Qazaqstanda «Aýyl – el besigi» jobasy qalaı júzege asyrylyp jatyr

ÓSKEMEN. QazAqparat – «Aýyl – el besigi» jobasy negizgi 3 baǵytty qamtıdy. Atap aıtqanda, aýyldy jerlerdi jańǵyrtý, agroónerkásiptik keshendi damytý jáne halyqtyń aýyldan údere kóshýin toqtatý. Búginde Shyǵys Qazaqstanda bul joba qalaı iske asyrylyp jatyr? Osy maqalamyzda bul suraqtyń jaýabyn tarqatyp kórdik.

116 aýyldyń tizimi jasaldy

2019 jyldyń aqpanynda baǵdarlama alǵash iske qosylǵanda Shyǵys Qazaqstanda 4 tirek aýyl, atap aıtqanda Glýbokoe, Kókpekti, Kúrshim jáne Úrjar aýyldary qamtylǵan bolatyn.

ShQO ákimdiginiń málimetine súıensek, 4 eldi mekendegi kóshelerdi ortasha jóndeý, 3 sporttyq-saýyqtyrý kesheni men Mádenıet úılerin salý syndy 8 jobany júzege asyrý úshin respýblıkalyq bıýdjetten 2,1 mlrd teńge bólingen.

Oblystyń 20 tirek aýylynda 51 jobany iske asyrý úshin respýblıkalyq bıýdjetten 7,7 mlrd teńge jumyldyryldy. Óńir aýyldarynyń ınfraqurylymdyq máselelerin sheshýge qosymsha 16,2 mlrd teńge bólindi.

Osylaısha, «Aýyl - el besigi» jobasyna barlyǵy 23,7 mlrd teńge quıylǵan.

Búginde joba aıasynda tirek aýyldar men basqa da eldi mekenderdiń áleýmettik jáne ınjenerlik ınfraqurylymyn damytý, aýyl turǵyndarynyń áleýmettik járdemaqylar men memlekettik qyzmetterge qoljetimdiligin qamtamasyz etý, qoǵamǵa qolaıly ómir súrý ortasyn qalyptastyrý mindetteri sheshimin taýyp keledi.

«Aýyl - el besiginiń» aımaqtyq jospary boıynsha bilim berý salasynda 13 joba qamtylmaq. Sondaı-aq densaýlyq saqtaý, mádenıet jáne sport salalarynda 6 jobadan. Al jol jóndeý boıynsha 20 joba bar. Memleket basshysy Qasym-Jomart Toqaev tirek aýyldarǵa aımaqtyq standarttardy engizýdi tapsyrǵan bolatyn. Buǵan jarqyn mysal retinde shekaralyq 5 aýdandy aıtýǵa bolady: Kúrshim, Katonqaraǵaı, Úrjar, Zaısan jáne Tarbaǵataı. Osy aýdandar boıynsha aldaǵy bes jylǵa áleýmettik-ekonomıkalyq damýdyń keshendi jospary bekitilgen. Qarjylandyrýdyń jalpy mólsheri 218,5 mlrd teńgeni qurap otyr», - dedi oblys ákimi Danıal Ahmetov.

Bekitilgen ólshemder negizinde Shyǵys Qazaqstan oblysyndaǵy 683 eldi mekenniń ishinde perspektıvti 116 aýyldyń tizimi jasaldy.

Bıyl ınfraqurylymdyq máselelerdi sheshý úshin 20 tirek aýyl tańdalyp otyr.

Atap aıtqanda, Glýbokoe, Borodýlıha, Kókpekti, Kúrshim, Marqakól, Qaljyr, Úlken Naryn, Katonqaraǵaı, Soldatovo, Tuǵyl, Aqjar, Úrjar, Maqanshy, Altynshoqy, Sholpan, Qaratal, Qaraýyl, Qalbataý, Aqtoǵaı, Áýezov aýyldary.

Búgingi tańda 44 joba máresine jetti. Osy jyldyń sońyna deıin taǵy 4 obekti aıaqtalady dep josparlanǵan. Al 3 joba kelesi jylǵa deıin sozylady.

Qarajattyń jumsalýyna monıtorıng qalaı júrgiziledi

Glýbokoe aýylynda Mádenıet úıi boı kóterdi. Sonymen qatar kópir salynyp, joldar, mektepter, balabaqsha men aýrýhana jóndeldi.

Medıtsınalyq mekemede jańa juqpaly aýrýlar bólim ashyldy. Kópqabatty úıler salynyp, aýlalar abattandyryldy. Jasóspirimder sport mektebiniń ǵımaraty jańartyldy.

Úrjar aýylynda sporttyq-saýyqtyrý kesheni boı kóterdi. Sý qubyrlary men kópbalaly otbasylarǵa arnalǵan turǵyn úıler salyndy. Aýlalar, kitaphanalar men klýbtar abattandyrylyp, fýtbol jáne oıyn alańdary ashyldy.

«Kúrshim, Marqakól, Úlken Naryn, Katonqaraǵaı aýyldarynda talaı jyldardan beri alǵash ret turǵyn úıler, onyń ishinde kópbalaly otbasylarǵa arnalǵan baspanalar salynyp jatyr. Joldar, bilim berý jáne densaýlyq saqtaý mekemeleri, klýbtar salynyp, kúrdeli jóndeýden ótti. Sondaı-aq aýlalar abattandyrylyp, oıyn alańdary ashyldy. 2026 jyldyń sońyna qaraı «Aýyl – el besigi» jobasy men basqa da memlekettik baǵdarlamalar sheńberindegi memlekettik qoldaý sharalary barlyq 116 tirek eldi mekendi qamtyp, basqa da shekaralas aýyldar kólik baılanysymen qamtamasyz etiledi», - delingen ákimdik málimetinde.

Úrjar aýdanynyń ákimi Nurjan Toqseıitovtiń aıtýynsha, bıyl «Aýyl – el besigi» baǵdarlamasy aıasynda Qabanbaı aýylyndaǵy sport modýlin salý josparlanǵan.

Aýyl kóshelerin jóndeý jumystary da júrgizilip jatyr.

«Baǵdarlama aıasynda 4 aýyldaǵy, atap aıtqanda Joǵary Eginsý, Keldimurat, Qabanbaı jáne Taskeskende 22 shaqyrym jol jóndeýden ótedi. Jańa oqý jyly bastalar aldynda Aqtanberdi, Eginsý jáne Maılın atyndaǵy 3 mektepte kúrdeli jóndeý júrgizildi», - dedi ol.

Jańa jumys oryndary ashylýda

Osy oraıda oblysta «Nurly jol», «Nurly jer», «Eńbek», «Bıznestiń Jol kartasy-2025» jáne agroónerkásiptik keshendi damytatyn baǵdarlamalar júzege asyrylýda.

Jasalǵan keshendi qadamdardyń nátıjesinde, kólik joldary jelisi damytylyp, shaǵyn aýdandarda turǵyn úı qurylysy men ınjenerlik kommýnıkatsııalar salý, sýmen jabdyqtaý, aýyl sharýashylyǵyn qoldaý, shaǵyn kásipkerlik pen týrızmdi damytý, halyqty áleýmettik qorǵaý jáne jumyspen qamtý jobalary iske aspaq.

«Aýyl – el besigi» jobalarynyń iske asyrylýyn baqylaý úshin ár jobanyń pasporty men oryndalý merzimi kórsetilgen egjeı-tegjeıli jospary ázirlenip, jaýapty qyzmetkerler bekitildi. Atqarylǵan jumystar men bólingen qarajattyń jumsalýyna apta saıyn monıtorıng júrgiziledi. Halyqty áleýmettik qoldaý turǵysynan qaraǵanda, «Aýyl - el besigi» jobasymen qamtylǵan 20 aýylda 2 myńǵa jýyq jumys orny ashylýda. Bul ásirese pandemııa kezinde úlken mańyzǵa ıe», - deıdi aımaq basshysy Danıal Ahmetov.