Shyǵys Qazaqstanda áli de 13 ýchaskede sel qaýpi bar
ShQO tótenshe jaǵdaılar departamenti baspasóz qyzmetiniń málimetine súıensek, mamyr aıynyń ortasynan óńirde sel qaýpi joǵary kezeń bastaldy.
Jalpy oblys boıynsha sel júrý qaýpi tónip turǵan 13 oshaq bar, olar Altaı, Katonqaraǵaı, Zaısan aýdandary men Rıdder qalasynda ornalasqan.
«Atalǵan aýdandardaǵy taýlardyń basynda 146 muzdyq kól paıda boldy. Bul kólder 13 eldi mekenge qaýip tóndiredi. Mamandar jyl saıyn kólder muzdan áli ashylmaǵan sátten bastap jáne olardyń tolyq erýine deıin sel qaýpin baqylaý úshin aerovızýaldy zertteý júrgizedi», - delingen aqparatta.
Oblysta 9 ýchaskede kóshkin qaýpi bar.
Bul negizinen avtojoldarda, ózen basseınderinde, Rıdder qalasyndaǵy Gromotýha, Úbe, Altaı aýdanyndaǵy Buqtyrma, Hamır, Chernovaıa, Katonqaraǵaı aýdanyndaǵy Buqtyrma, Zaısan aýdanyndaǵy Kendirlik jaǵalyq eńister men taýlardyń kesindilerinde.
«Sel qaýpi bar ýchaskelerde 20 eskertý jáne tyıym salý qalqany jáne kóshkin qaýpi joǵary ýchaskelerde 18 qalqan ornatyldy. Sel jáne kóshkin júrýi múmkin aýdandardyń jergilikti atqarýshy organdaryna, obektiler men kásiporyn basshylaryna, jeke turǵyn úı ıelerine tıisti habarlamalar men usynymdar jiberildi», - delingen habarlamada.