Shyǵys Qazaqstanda aldaǵy qos merekege oraı 350-ge jýyq is-shara ótedi

ÓSKEMEN. QazAqparat – Shyǵys Qazaqstan oblysynda Otan qorǵaýshylar kúni men Jeńis kúni qalaı atalyp ótiletini belgili boldy, dep habarlaıdy QazAqparat tilshisi.

Shyǵys Qazaqstanda aldaǵy qos merekege oraı barlyq qala, aýdanda 342 shara ótkizilmek. Bul týraly ShQO Qoǵamdyq damý basqarmasynyń basshysy Janat Mekeeva málim etti.

«7 mamyr - Otan qorǵaýshylar kúni aıasynda 151 shara uıymdastyrylady. Onyń ishinde merekelik kontsertter, áskerı-patrıottyq sharalar, áskerı bólimderde Ashyq esik kúnderi, túrli aktsııalar men chellendjder bar. Sondaı-aq oblystyń barlyq mektebinde «Erlik sabaqtary» ótkiziledi», - deıdi ol.

7 mamyrda Óskemendegi Dańq memorıalynda «Jas sarbaz» áskerı-patrıottyq klýbtarynyń sherýi josparlanǵan.

«Jeńis kúninde óńir boıynsha 190-nan astam shara ótip, 24 myńnan astam adam qamtylady. Aldaǵy merekelerdiń basty qundylyǵy men mańyzy – óskeleń urpaqty patrıottyqqa tárbıeleý, otansúıgishtikke baýlý. UOS ardagerlerine erekshe kóńil bólinedi. Olar úshin 23 ataýly shara, onyń ishinde «Ardagerlerdi ardaqtaıyq» aktsııasy uıymdastyrylady», - deıdi J.Mekeeva.

9 mamyrda Óskemende tańerteń Dańq memorıalyna gúl shoqtary qoıylyp, saǵat 18.00-de keshki kontsert, al saǵat 21.00-de shamdar jaǵylyp, eske alý aktsııasy ótkiziledi. 22.00-de otshashý atylady.