Shyǵys Qazaqstanda 7700-ge jýyq úıdi sý basý qaýpi bar

ÓSKEMEN. QazAqparat – Shyǵys Qazaqstan oblysynda 7700-ge jýyq úıdi sý basý qaýpi bar, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, búgingi tańda oblysta kún jylytyp, qar erip jatyr. Aımaqtaǵy qar bıiktigi 1 sm-den (Tarbaǵataı aýdany) 133 sm-ge deıin (Kúrshim aýdany Marqakól qoryǵy) jetedi.

«Shyǵys Qazaqstanda gıdrologııalyq jaǵdaı turaqty. Ózenderde sýdyń deńgeıi tómen. Muzdyń ortasha qalyńdyǵy – 80 sm. Qarǵyn sýdy qaýipsiz ótkizýge múmkindik beretin Buqtyrma sý qoımasyndaǵy retteýshi syıymdylyǵy – 20 mlrd 722 mln tekshe metr», - delingen aqparatta.

Oblys aýdandarynda barlyǵy 108 eldi mekendi sý basý qaýpi bar. Ondaǵy 7682 úıde 23 576 adam turady. TJD mamandarynyń kópjyldyq derekteri boıynsha sý basý qaýpi Óskemen qalasy, Altaı, Katonqaraǵaı, Tarbaǵataı, Glýbokoe, Shemonaıha, Kókpekti jáne Borodýlıha aýdandary úshin joǵary.

Aıta keteıik, óńirde sý tasqyny qaýpi joǵary kezeńde 838 tehnıka, 179 motopompa jáne 111 evakýatsııalyq pýnkt daıyndalǵan.