Shyǵys Qazaqstanda 26 myńnan astam adam kólik salyǵyn tólemegen
ShQO memlekettik kirister departamentiniń málimetine súıensek, búginde óńir boıynsha 26 130 adam kólik salyǵyn tólemeı keledi.
Olardyń qaryzynyń jalpy somasy 784 mln teńgeni qurap otyr.
«Jyl basynan beri atqarylǵan sharalardyń nátıjesinde, salyq boıynsha bereshegi bar 48 589 adamnan 878,9 mln teńge óndirildi. Oblystyq polıtsııa departamenti qyzmetkerlerimen birlesip, salyq tólemegen kólik ıelerin anyqtaý maqsatynda reıdter júrgizilýde. Sonyń barysynda «Sergek» júıesiniń kómegimen qaryzy bar kólik júrgizýshileri toqtatylady», - deıdi departamenttiń óndiristik emes tólemder basqarmasy basshysynyń mindetin atqarýshy Roza Seıilhanova.
Onyń aıtýynsha, eger júrgizýshi bereshekti ótemegen jaǵdaıda kóligin aıyppul turaǵyna alyp ketý jazasy da qoldanylady.
Bıyldyń ózinde osylaısha 43 kólik aıyppul turaǵyna qoıylǵan.