Shyǵys Qazaqstanda 200-den astam kópbalaly otbasy baspanaly bolmaq
ShQO ákimdiginiń málimetine súıensek, bıyl óńir boıynsha 952 myń sharshy metr baspana salynyp jatyr. Bul maqsatta 190 mlrd teńge jumyldyrylǵan. Onyń ishinde 650 myń sharshy metr kommertsııalyq turǵyn úıdi salý úshin 150 mlrd teńge jeke ınvestıtsııa tartyldy.
«Ótken jyly kópbalaly otbasylar úshin 3 mlrd teńgege 228 páter salyndy. Bıyl taǵy 203 kópbalaly otbasy baspanaly bolmaq. Onyń ishindegi 145 otbasy aýylda turady», - deıdi oblys ákimi Danıal Ahmetov.
Sondaı-aq ol Prezıdenttiń halyqty 2025 jylǵa deıin ortalyqtandyrylǵan sýmen qamtamasyz etý jónindegi tapsyrmasyn oryndaý maqsatynda jyl sońyna deıin 22,3 mlrd teńgege iske asyrylyp jatqan 24 jobanyń 13-i máresine jetetindigin jetkizdi.
Osylaısha, qazir aýyl turǵyndaryn ortalyqtandyrylǵan sýmen qamtý kórsetkishi 95,4 paıyzdy qurasa, 2023 jyldyń sońyna qaraı bul kórsetkish 97,1 paıyzǵa jetpek.