Shyǵys Qazaqstanda 2 áýejaı qaıta jańartylady

ÓSKEMEN. QazAqparat – Shyǵys Qazaqstan oblysynda 2 áýejaı qaıta jańartylmaq, dep habarlaıdy QazAqparat.

Oblystyq jolaýshylar kóligi jáne avtomobıl joldary basqarmasynyń málimetine súıensek, 2019 jyly «Nurly jol» baǵdarlamasy boıynsha Óskemen qalasy men Úrjar aýdanynyń ortalyǵyndaǵy áýejaılardy qaıta jańartý maqsatynda jobalyq-smetalyq qujattama ázirlengen. 2020-2022 jyldar aralyǵynda iske asatyn bul jobaǵa 15,3 mlrd teńge bólinedi.

«Óskemen áýejaıyndaǵy ushý-qoný jolaǵy 2800 metrge deıin uzartylady. Al Úrjardaǵy áýejaı qosymsha taǵy 2100 metrge deıin sozylmaq. Nátıjesinde munda úlken ushaqtar emin-erkin qona alatyn bolady. Sondaı-aq ýaqytsha saqtaý qoımalary, júk termınaly salynyp, áýe kemesiniń turaǵy keńeıedi. Áýejaıda jylý júıesi aýystyrylyp, rezervtik elektrlik qýattandyrý júzege asyrylady», - dep habarlady basqarma mamandary.

Bıyl tek oblys ortalyǵyndaǵy áýejaıda qurylysqa daıyndyq jumystary júrgizilmek. Áýejaıdyń jumysy rejıminde ázirge esh ózgeris bolmaıdy. Negizgi jumys 2021 jyly bastalady. Sol kezde barlyq reıster keshki jáne túngi kezeńderge aýystyrylady.

«Kúndiz qaıta jańartý jumystary júrgizilse, keshke qaraı áýejaıdan jolaýshylar saparǵa attanady. Áýejaıdyń jumysy toqtamaıdy» delingen málimette.