Shyǵys Qazaqstanda 2,5 tonnadan astam jabaıy qarasora órteldi

ÓSKEMEN. QazAqparat – Shyǵys Qazaqstan oblysynda 2,5 tonnadan astam jabaıy qarasora órteldi, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary Ulttyq qaýipsizdik komıteti qyzmetkerlerimen birlesip, 2,5 tonnadan astam jabaıy qarasorany órtedi.

«Quramynda esirtki zattary bar ósimdikterdi zańsyz ósirý jáne olar ózdiginen ósetin oryndardy anyqtaý maqsatynda óńir aýmaǵyna tikushaqpen barlaý jasaldy. Qabyldanǵan sharalar nátıjesinde, Zaısan aýdanynyń aýmaǵynda bıiktigi adam boıyna jetetin, uzyndyǵy 5 shaqyrymnan asatyn qarasora tuqymdas ósimdik plantatsııasy joıyldy. Bul ósimdikten «marıhýana» jáne «gashısh» sııaqty esirtki quraldary ázirlenedi», - delingen aqparatta.

Jyl basynan beri Shyǵys Qazaqstanda 90-nan astam esirtki qylmysy anyqtalǵan.

Onyń ishinde quramynda esirtki zattary bar ósimdikterdi zańsyz ósirýdiń 11 faktisi tirkelip otyr.

Bıyl zańsyz aınalymnan 250 keliden astam túrli esirtki, onyń ishinde 5,5 keli sıntetıkalyq esirtki tárkilendi.