Shyǵys Qazaqstanda 1500 adam kóktemgi áskerı qyzmetke shaqyryldy

ÓSKEMEN. QazAqparat - Shyǵys Qazaqstan oblysynda Otan Qorǵaýshylar kúnine oraı áskerge shaqyrylǵan azamattardy Qazaqstan armııasy qataryna saltanatty túrde shyǵaryp salý rásimi ótti, dep habarlaıdy QazAqparat tilshisi.

Otan qorǵaýshylar kúni qarsańynda ásker quramyna jas sarbazdar jiberildi.

«El Táýelsizdiginiń 30 jyldyǵyna tuspa-tus kelgen áskerı shaqyrtýdyń mańyzy erekshe. QR Qarýly Kúshteri Otanymyzdyń shebin nyq kúzetedi. Bıyl kóktemgi áskerge shaqyrý maýsymynda Qazaqstan armııasynyń qatary merzimdi qyzmettegi 1500 jaýyngermen tolyqpaq. Barlyǵy - 18-27 jas aralyǵyndaǵy jastar. Basym bóligi 2000-2001 jyldary týǵandar», - delingen ShQO Aqparat ortalyǵy taratqan aqparatta.

Roman Fýnt Shyǵys Qazaqstan oblysy Borodýlıha aýdanynan keldi. Ol áskerge barýdy óziniń Otan aldyndaǵy boryshy dep sanaıdy.

«Óz erkimmen áskerge attanyp baramyn. Áýe qorǵanys kúshterinde qyzmet etemin. Menińshe, árkim áskerı mektepten ótýi kerek. Otanymyzdy qorǵaý - árbir azamattyń boryshy jáne mindeti», - deıdi Roman.

Jas sarbazdar elimizdiń túrli áskerı bólimderine jiberilmek.

Onyń arasynda UQK shekara qyzmeti, Qorǵanys, TJ mınıstrliginiń bólimderi jáne QR Ulttyq ulany bar.