Shyǵys Qazaqstan oblysynda praımerız qorytyndysy shyǵaryldy

ÓSKEMEN. QazAqparat – Shyǵys Qazaqstan oblysynda barlyq deńgeıdegi máslıhattarda, sonyń ishinde QR Parlamenti Májilisinde tıimdi depýtattyq korpýsty qalyptastyrý úshin kandıdattar arasynda ashyq irikteý júrgizildi, dep habarlaıdy QazAqparat tilshisi.

Aımaq basshysy, «Nur Otan» partııasy oblystyq fılıalynyń tóraǵasy Danıal Ahmetov elimizde alǵash ótkizilip otyrǵan partııaishilik irikteýge qatysqan úmitkerlermen kezdesý ótkizdi.

Praımerızge Shyǵys Qazaqstan oblysynan myńnan astam kandıdat tirkelip, úgit-nasıhat jumystaryn júrgizdi. Ashyq pikirsaıystar ótkizip, qoǵamnyń ózekti máselelerin sheshýdiń joldaryn usyndy. Daýys berý kezeńine 923 kandıdat ótti. Dúıim jurt «Praımerız» portalynda qalaǵan kandıdatyna daýys berdi.

«Partııaishilik saılaýǵa túsken barlyq kandıdattar azamattyq belsendilikteriniń joǵary ekendigin kórsetti. Saılaý nátıjesine qaramastan, árbir qatysýshy baǵa jetpes tájirıbe jınaqtady dep oılaımyn. Praımerız –ashyq, ári erkin oı bólisýge, bir-birimizdi tyńdaýǵa, saıasatqa saýatty aralasýǵa úıretti», – dedi oblys ákimi.

Úgit-nasıhat barysynda kandıdattar óńirdegi eldi mekenderdiń birqatar máselesin kórsetti. Olar ózara pikirtalasta problemalardy jáne onyń sheshý joldaryn talqylady. Arnaıy qurǵan baǵdarlamalaryn BAQ-ta jáne áleýmettik jelilerde halyq arasyna belsendi tanystyrdy.

Danıal Ahmetovtiń aıtýynsha, praımerız barysynda 1,5 myńnan astam ótinish kelip túsken. Kandıdattar nátıjege qaramastan máselelerdiń sapaly sheshilýine monıtorıng jasap, úlesin qosa alady. Kezdesý sońynda barlyq qatysýshylarǵa «Nur Otan» partııasynyń oblystyq, qalalyq fılıaldary tóraǵalarynan alǵys hattar tabys etildi.