Shyǵys Qazaqstan oblysynda qandaı azyq-túlik qymbat

ÓSKEMEN. QazAqparat – Shyǵys Qazaqstan oblysynda apta saıyn azyq-túlik baǵasyna monıtorıng júrgizilýde, dep habarlaıdy QazAqparat tilshisi.

ShQO Kásipkerlik jáne ındýstrııalyq-ınnovatsııalyq damý basqarmasynyń málimetine súıensek, óńir boıynsha 19 taýar eń tómengi ústeme baǵamen satylady. Jalpy aımaqqa kúrish, qant pen tuz basqa oblystardan jetkizilýde. Al qalǵan áleýmettik mańyzy bar azyq-túlikter Shyǵys Qazaqstannyń ózinde óndirilip jatyr.

Óskemen qalasynda jyl basynan beri 8 taýardyń baǵasy ósken. Atap aıtqanda, sábiz, kartop, qyryqqabat, pııaz, kúnbaǵys maıy, taýyq eti, qaraqumyq jarmasy jáne qant.

«Óńir aýmaǵynda 44 áleýmettik dúken jumys istep tur. Sondaı-aq quzyrly organdar apta saıyn baǵaǵa monıtorıng júrgizýde. Kúnbaǵys maıynyń baǵasy shilde aıynda álemdik naryqta shıkizattyń 120-dan 300 teńgege deıin ósýine baılanysty birshama qymbattaǵan bolatyn. Osy aıdyń sońyna deıin kúnbaǵys maıynyń baǵasy shamamen 100 teńgege tómendeıdi dep kútilýde», - delingen aqparatta.