Shyǵys Qazaqstan oblysy ormandarynda bıylǵy jazda 45 ret órt shyqty

ÓSKEMEN. QazAqparat – Shyǵys Qazaqstan oblysynyń ormandarynda jaz shyqqaly beri 45 ret órt boldy, dep habarlaıdy QazAqparat tilshisi.

ShQO Tabıǵı resýrstar jáne tabıǵat paıdalanýdy retteý basqarmasynyń málimetine súıensek, órt qaýpi joǵary kezeń bastalǵaly beri óńir ormandarynda 45 órt tirkelgen. Órttiń kóbi naızaǵaıdan shyqqan.

«Barlyq ormanda demalys jáne mereke kúnderi arnaıy kezekshilik uıymdastyrylǵan. Orman aýmaǵyn órtten qorǵaýdy jáne ottyń shyqqanyn dereý anyqtaý maqsatynda memlekettik orman kúzetiniń jáne orman sharýashylyqtarynyń 1 077 adamy kezekshilik atqarady», - deıdi basqarma basshysynyń orynbasary Arman Esentaev.

Qajet bolǵan jaǵdaıda órtke qarsy 160 tehnıka jáne 3 000-nan astam qural-jabdyq daıyn tur. Ormanda avıabaqylaýdy «Qazavıaqorǵaý» mekemesi júzege asyrady. Onda 2 MI-2 tikushaqy, 1 MI-8 tikushaqy, 1 AN-2 tikushaqy jáne 16 órt sóndirýshi-desantshy bar.

Sondaı-aq tótenshe jaǵdaıǵa ýaqytyly den qoıý úshin aýdan ákimdikteri 44 órt sóndirý beketin qurǵan. Onda jalpy sany 935 adam jumys isteıdi. Beketter 145 beıimdelgen tehnıkamen qamtylǵan.