Shyǵys Qazaqstan oblysy gazben qashan qamtylady - mınıstr jaýap berdi

NUR-SULTAN. QazAqparat – Shyǵys Qazaqstan oblysyna gaz qashan jetedi? Bul suraqqa elimizdiń Energetıka mınıstri Maǵzum Myrzaǵalıev jaýap berdi, dep habarlaıdy QazAqparat tilshisi.

Búgin elordada alǵash ret «KIOGE-2021» halyqaralyq munaı jáne gaz kórmesi ashyldy.

Kórmeniń ashylýyna elimizdiń Energetıka mınıstri Maǵzum Myrzaǵalıev qatysyp, onda qoıylǵan ónimdermen tanysyp ótti.

Shara barysynda mınıstr munaı jáne gaz salasyna qatysty BAQ ókilderiniń suraǵyna jaýap berdi. Tilshiler kótergen máseleniń biri - Shyǵys Qazaqstanǵa gaz jetkizý.

«ShQO-ǵa gaz tartý jaqyn ýaqytta josparda joq. Biraq atalǵan másele bizdiń mınıstrliktiń kún tártibinde bar jáne ony Reseımen birlesip sheshý qarastyrylyp otyr. Atalǵan óńirdi gazdandyrýdy kórshi Reseıdiń resýrsy esebinen sheshýge bolady. Ol úshin bólek gaz qubyryn tartý qajet», - dep jaýap berdi M. Myrzaǵalıev.

Sondaı-aq, mınıstr ShQO-nyń Zaısan aýdanyn gazben qamtý máselesine arnaıy toqtalyp ótti.

«Zaısan aýdanyn gazdandyrý jumysy 2013-2014 jyldary bastaldy. Gaz qubyryn tartý josparyna saı 9 eldimekenge gaz jetkizildi. Búginde jumys jalǵasyp jatyr», - deıdi ol.

Buǵan deıin mınıstr elimizdegi dızel baǵasynyń qymbattaýyna qatysty túsinik bergen edi.

Sondaı-aq, M. Myrzaǵalıev elimizge kem degende 100 myń tonna reseılik dızel otyny ákelinetinin aıtty.

Odan bólek, vedomstvo basshysy 2028 jyly «Qalamqas» jáne «Hazar» ken oryndaryn ıgerý bastalatynyn jetkizdi.