Shyǵys Qazaqstan mektepterinde órt qaýipsizdigi erejesin buzýǵa qatysty 700-den astam jaǵdaı tirkeldi

ÓSKEMEN. QazAqparat – Shyǵys Qazaqstan oblysyndaǵy mektepterde órt qaýipsizdigi erejesin buzýdyń 700-den astam faktisi tirkeldi, dep habarlaıdy QazAqparat tilshisi.

ShQO Tótenshe jaǵdaılar departamentiniń qyzmetkerleri jańa oqý jylynyń qarsańynda mektepterdegi órt qaýipsizdigi erejeleriniń saqtalýyna tekserý júrgizdi.

«Obektiler aýmaǵynyń, ǵımarattarǵa kirme joldardyń, órtke qarsy sýmen jabdyqtaý, órt avtomatıkasy, evakýatsııalaý joldarynyń jaı-kúıine, jaryqtandyrý, elektr jabdyqtarynyń jaramdylyǵyna, alǵashqy órt sóndirý quraldarymen qamtamasyz etilýine erekshe nazar aýdaryldy. Anyqtalǵandaı, kóbinese evakýatsııa joldarynyń bógde zattarmen bitelýine baılanysty buzýshylyqtar, órt qaýipsizdigi jónindegi qujattamadaǵy kemshilikter, bastapqy órt sóndirý quraldarynyń qajetti sanynyń bolmaýy jıi kezdesedi. Órt ınspektorlarynyń usynymdaryn mektep ákimshiligi oqý jyly bastalǵanǵa deıin oryndaýǵa mindetti», - deıdi TJD memlekettik órt baqylaý basqarmasynyń bastyǵy Nurjan Ómirjanov.

Jyl ishinde oblys boıynsha 180 mektepke osyndaı tekserý júrgizilgen. Sonyń nátıjelerine sáıkes, órt qaýipsizdigi talaptaryn buzýǵa qatysty 742 fakti tirkeldi.

Eske salsaq, osyǵan deıin Óskemen qalasyndaǵy mektepterdiń sportzaldary, syrttaǵy sporttyq jabdyqtary qanshalyqty qaýipsiz ekendigi týraly reportaj bergen edik.