Shyǵyp qalǵan máslıhat depýtattarynyń ornyna kimder úmitker

ASTANA. QazAqparat - Búgin QR Ortalyq saılaý komıssııasynyń tóraǵasy Berik Imashevtyń tóraǵalyǵymen otyrys ótip, onda 28 qazanǵa belgilengen shyǵyp qalǵan máslıhat depýtattarynyń ornyna kandıdattardy tirkeý máselesi qaraldy, dep habarlaıdy QazAqparat tilshisi.

«Qazaqstan Respýblıkasynyń saılaý týraly» Konstıtýtsııalyq zańynyń 101 babyna sáıkes shyǵyp qalǵan máslıhat depýtattaryn saılaý bir mezgilde, qazannyń sońǵy jeksenbisinde, ıaǵnı 2018 jyldyń 28 qazanyna taǵaıyndaldy. Aǵymdaǵy saılaý naýqanynda shyǵyp qalǵan máslıhat depýtattary saılaý boıynsha 83 bos okrýg bar. Onyń ishinde 12 oblystyq, 9 qalalyq, jáne 62 aýdandyq máslıhat depýttary saılanady. Barlyq deńgeıdegi máslıhat depýtattaryn saılaý boıynsha bos okrýgter Túrkistan oblysynda jáne Almaty men Shymkent qalasynda joq.

Saılaý naýqany barysynda 284 kandıdat usynyldy. Onyń 203-i er, 81-i áıel adam. Kandıdattardyń ortasha jasy - 41,5. 250 kandıdattyń joǵary, 28-iniń orta arnaýly jáne altaýynyń orta bilimi bar.

Tirkelgen kandıdat sany - 249. Onyń 177-si er, 72-si áıel adam. Tirkelgen kandıdattardyń ortasha jasy - 41,8. 219 kandıdattyń joǵary, 24-iniń orta arnaýly jáne altaýynyń orta bilimi bar.

Tirkelgen kandıdattardyń barlyǵy saılaý aldy úgit-nasıhat jumystaryna kirisken. Úgit-nasıhat jumystary 26 qazan kúni saǵat 00-00-ge deıin jalǵasady.