Shyǵarmashylyq emtıhan tapsyratyndar úshin UBT-da qandaı ózgerister bar

Ǵylym jáne joǵary bilim mınıstri Saıasat Nurbek kelesi jylǵy UBT-da bolatyn birqatar ózgeristerdi jarııa etti, dep habarlaıdy QazAqparat.

«Bıylǵy taǵy bir jańalyq shyǵarmashylyq baǵyttardy tańdaǵan talapkerlerge qatysty, endi olar «Qazaqstan tarıhy» men «Oqý saýaty» pánderimen qatar «Matematıkalyq saýatty» mindetti pán retinde tapsyrady. «Matematıkalyq saýattan» test tapsyrmalary ómirde matematıkalyq logıka boıynsha alǵan bilimin, daǵdylaryn qoldana alýyn tekserýge baǵǵyttalǵan, sondyqtan bul pán barlyq testke tapsyrýshy úshin mindetti» dep atap ótti mınıstr Telegram paraqshasynda.

Beıindik pánderdiń kombınatsııasy boıynsha da ózgerister bar.

Oqýshylardyń, ata-analardyń jáne pedagogıkalyq qaýymnyń usynysyn eskere otyryp, «B059 – Kommýnıkatsııalar jáne kommýnıkatsııalyq tehnologııalar», «B055 – Matematıka jáne statıstıka», «B063 – Elektrotehnıka jáne avtomattandyrý» bilim baǵdarlamalarynyń toptaryna túsýshiler «Matematıka-Informatıka» kombınatsııasyn tapsyrady.

«Qorytyndylaı kele, ótken jyly QR Ǵylym jáne joǵary bilim mınıstrligi negizgi UBT-ny eki ret tapsyryp, úzdik nátıjemen grant taǵaıyndaý konkýrsyna qatysý múmkindigin resmı túrde bekitkenin eske salǵym keledi. Eger aqyly negizde túsý úshin UBT tapsyrýdyń taǵy úsh múmkindigi bar ekenin eskeretin bolsaq, onda 2024 jylǵy talapkerler testileýden bes ret óte alady. Bul ózgerister emtıhannan sátti ótip, maqsatyńyzǵa jetýge kómektesedi dep úmittenemiz. Bolashaqta jańa múmkindikter úshin bilim berý júıesin jetildirý jumysy jalǵasyn tabady» deıdi Saıasat Nurbek.

Eske sala keteıik, biz buǵan deıin kelesi jyly UBT-ǵa jańa suraqtar qosylyp, emtıhan tapsyrý ýaqyty 30 mınýtqa qysqaratynyn habarlaǵan edik.