Shyǵanaq Bersıevtiń janynda jumys istep, kúnine 1 keli tary aldyq - tyl ardageri
Aq tary sol kezde maıdan dalasyndaǵy jaýyngerlerdiń ǵana emes, aýyl adamdarynyń ómirin saqtap qaldy. Bul týraly QazAqparat tilshisine tyl ardageri Dına Baıseýova aıtyp berdi.
«Aqtóbeniń Oıyl aýdany soǵys jyldary maıdangerlerge kóp azyq jiberip, Shyǵanaq Bersıevtiń aq tarysy álimdik rekord ornatty. Tarıhqa súıensek, 1941 jyly gektarynan 165 tsentner ónim jınalsa, 1943 jyly gektarynan 201 tsentner tary alyndy. Soǵys jyldary tary tek maıdangerlerdiń emes, aýyl halqynyń janyn saqtap qalǵan azyq boldy. Bul sharýany mektep balalary tyńdyrdy.
«Soǵys bastalǵan jyly árkim qolynan kelgen isti jasady. Úndeý tastap, jumysqa shaqyrý, «aýyryp qaldym» dep jumystan qashý degen bolmady. Bári adamnyń yntasymen, jigerimen jasaldy. Er azamattar soǵysta, áıelder men balalar tylda. Shyǵanaq Bersıev aýylda qansha adam bolsa, eńbekke jaramdynyń bárin janyna aldy. Bastaýysh synyp balalary, jesir áıelder men kempirler boldy. Úlkenderi oraqpen oryp, odan qalǵanyn bes jastaǵy balalarǵa deıin teredi. Sol eńbegine 1 keli tary beredi. Sony qýyryp, túıip, dıirmenge salyp tartyp, jarma etip jeımiz»,- dedi tyl ardageri Dına Baıseýova.
Soǵys jyldary taryshy Shyǵanaq Bersıevtiń janynda jumys istegen Dına Baıseýova bar bolǵany 14 jasta bolǵan. Mektep oqýshylary, ásirese qyzdar shyqqan taryny orýǵa ǵana bardy. Tary sol jyldary sýarmaly ádispen ósirilgen.
«Taryny jınap, qapshyqpen qyrmanǵa tapsyramyz. Ol ýaqytta ógiz arba boldy. Tary arbamen tasymaldandy. Alǵashynda oraq ustaýdy bilmedik. Birneshe ret qolymyzdy kesip, qapshyqty kótere almaı qınalatyn edik. Shyǵanaq Bersıev óte qarapaıym boldy. Jyly shyraıly edi. Aýyl halqynyń jaǵdaıyna qarap, hal-jaǵdaılaryn bilip otyrdy. Jumystyń adamy. Eki jyl boıy sol jerde eńbek ettim»,- dedi Dına Baıseýova.
Tary maıdangerlerdiń ǵana emes, bútin aýyldy ashtyqtan aman alyp qaldy. Tań qylań bere alqapqa attanyp, tún bata úıine oralatyn aýyl adamdary tary jep, otbasyn asyrady.
«Soǵys jyldary bir adamnyń úıindegi tamaqty bári bólip jeıtin. Halyq uıymshyl boldy. Aýyrǵan adamdy kórmedik. Árkim ózi úshin eńbek etti, jan baqty. Halyqtyń rýhy myqty boldy, jeńiske sendi»,- dedi tyl ardageri.
Tary alqabynda urys-keris bolmaǵan. Ár adam óz jumysyn bildi, mindetin atqardy. Al 1 keli taryny az kórip, urlyq qylǵan adam zań boıynsha jazalanyp, isi sotta qaraldy.
Tyl ardageri Dına Baıseýova uzaq jyldar boıy ustazdyq etip, tynbaı eńbektengen adam. Ol beıbit zamanda sol jyldardyń qıyn kúnderin esten shyǵarǵan emes. Bala kúninde tary terip, tarymen tamaqtanǵan ardager kúni búginge deıin tarymen shaı ishedi.
Aıta keteıik, qazir Aqtóbe oblysy, Oıyl aýdanynda «Jaqyp» sharýa qojalyǵy tary ósirý sharýashylyǵyn qolǵa aldy. Tary-talqan jergilikti dúken sórelerine tústi.